Հանրապետականը, երբ որ ասելիք է ունենում, ասում է ուղիղ ու պատասխանատվություն է կրում իր ասածների համար. մենք երբեք միջնորդավորված ոչ մեկի հետ չենք խոսել՝ ի տարբերություն որոշ ուժերի, որ յոթ տարի շարունակ ֆինանսավորել են այս կամ այն պադվալներից, տարբեր գրասենյակներից վարձու գործիչների, ավելի ճիշտ՝ գործիքների աշխատանքը Հանրապետականի դեմ։ Այս մասին այսօր լրագրողների հետ զրույցում նշեց «Պատիվ ունեմ» խմբակցության ղեկավար Հայկ Մամիջանյանը:
«Մենք միշտ խոսում ենք ուղիղ, խոսում ենք մեր դեմքով և մեր ասելիքին տեր ենք»,-ասաց նա:
Հարցին՝ որտեղի՞ց էին այդ գործիքները, Մամիջանյանը պատասխանեց՝ ինքը բազմիցս դրա մասին խոսել է։
«Այդ արշավը յոթ տարի շարունակ Հանրապետականի և Սերժ Սարգսյանի դեմ, այդ կեղտոտ, սուտ արշավը վարող մարդկանց զգալի հատվածը ներկայանում է որպես Ռոբերտ Քոչարյանի աջակիցներ:
Ես խիստ կզարմանամ, եթե որևէ մեկը ներկայանում է որպես Ռոբերտ Քոչարյանի աջակից, ասում է բաներ, որոնք իր համար պիտի որ ընդունելի չլինեն, ու ինքը այդ ընթացքում իրենց չի սաստում, սա է իմ կարծիքը այդ հարցի շուրջ»:
Դիտարկմանը, որ «Հայաստան» դաշինքն էլ հայտարարում է, որ իմպիչմենտի գործընթաց նախաձեռնելու նպատակը «Հայաստան» դաշինքին թիրախավորելն է, Մամիջանյանն ասաց. «Նախ, ես չեմ մեկնաբանելու «Հայաստան» դաշինքի հայտարարությունը: Ձեր հարցի մեջ նշած տրամաբանությամբ ստացվում է որ կան մրդիկ, որոնք Նիկոլ Փաշինյանին անվստահություն հայտնելու գործընթացը տեսնում են դեմ այս կամ այն ուժին: Ես այդպես չեմ տեսնում ու վստահ եմ, որ իրենք ձեր հարցի ձևակերպման հետ չեն համաձայնվի: Այս գործընթացը Նիկոլ Փաշինյանին անվստահություն հայտնելու գործընթաց է, եթե կան ինչ-որ մարդիկ, որոնք Նիկոլ Փաշինյանին անվստահություն հայտնելու գործընթացը ընկալում են որպես իրենց դեմ գործընթացներ, ես ոչինչ այդտեղ ասել չեմ կարող:
Որպեսզի այս գործընթացը բարդույթներ, ամբիցիաներ, քաղաքական նկրտումներով չբարդանա, մենք պատրաստ ենք թեկնածուի շուրջ քննարկումներին, զրո ամբիցիայով, ինչպես եղել է այս յոթ տարիների ընթացքում: Իրական ընդդիմադիր ցանկացած թեկնածուի հետ, մենք սիրով կնախաձեռնենք այդ գործընթացը։ Այո, եթե «Հայաստան» դաշինքը առաջարկի Ռոբերտ Քոչարյանի թեկնածությունը, մենք դրան կմիանանք»:
