Իրանում ապրիլի 28-ին ազգային սուգ է հայտարարված Բանդար Աբասի նավահանգստում տեղի ունեցած ողբերգության կապակցությամբ։ MehrNews գործակալության հաղորդմամբ՝ այս մասին հայտնել է կառավարության պաշտոնական ներկայացուցիչ Ֆաթեմե Մոհաջերանին։
Ավելի վաղ Իրանի հարավային Հորմոզգան նահանգի ղեկավար Մոհամմադ Աշուրին եռօրյա սուգ էր հայտարարել տարածաշրջանում։
Հիշեցնենք, որ Բենդեր Աբասում ապրիլի 26-ին հզոր պայթյուն է որոտացել։ ԶԼՄ–ների տեղեկություններով` պայթյունը եղել է նավամատույցում` վառելիքի ջրամբարի բռնկման հետևանքով։ Ինչպես հաղորդում է Fars–ը, պայթյունն այնքան հզոր է եղել, որ լսվել է Քեշմ կղզում, որը գտնվում է Պարսից ծոցի Բանդար Աբաս նավահանգստային քաղաքից առնվազն 20 կմ հեռավորության վրա։ Պայթյունի հետևանքով մի քանի կիլոմետր շառավղով պատուհաններ են կոտրվել։
Իրանի Կարմիր մահիկի ընկերությունը կիրակի կեսօրին հրապարակված միջադեպի վերաբերյալ իր վերջին վիճակագրության մեջ հայտնել է, որ զոհվել է 28 մարդ, ևս 1242 մարդ վիրավորվել է:
