71 տարեկանում մահացել է «Ազատություն» ռադիոկայանի երկարամյա լրագրող Արմեն Դուլյանը: Ինքնազգացողության կտրուկ վատացումից հետո հիվանդանոցում նրա կյանքը փրկել չի հաջողվել:
Արմեն Դուլյանը 1994 թվականից մինչև 2008 թվականն աշխատել է «Ազատություն» ռադիոկայանի Պրահայի կենտրոնակայանում, ապա Երևանի բյուրոյում՝ որպես մեկնաբան ու լրագրող:
Նա առանձնանում էր իր սուր լրագրողական ոճով, քննադատական մտածողությամբ, ամենաբարդ թեմաները պարզ մատուցելու կարողությամբ՝ արժանանալով «Ազատության» ունկնդիրների բարձր գնահատականին և սիրուն:
«Ազատության» խմբագրակազմը ցավակցում է Արմեն Դուլյանի հարազատներին մեր գործընկերոջ մահվան կապակցությամբ:
Արմեն Դուլյանն աշխատել է նաև Հայաստանի հեռուստակայաններում, տեղական ու միջազգային ռադիոկայաններում, հոդվածներ է տպագրել պարբերական մամուլում։
2019 թ. հոկտեմբերից մինչ օրս հեղինակային ամենօրյա ռադիոհաղորդումների շարք է վարել Sputnik Արմենիա լրատվական գործակալությունում՝ առողջական խնդիրները հաշվի չառնելով՝ բարեխղճորեն կատարելով իր պարտականությունները. Նրա վերջին հաղորդումը եթեր է գնացել հունվարի 24-ին։
