Լեհաստանի Սենատը ընդունել է բանաձեւ Վոլինի կոտորածիՙ 1943 թ. էթնիկական հակամարտության 70-ամյակի կապակցությամբ: Այդ հակամարտության հետեւանքը դարձել էր Վոլինի լեհ բնակչության ոչնչացումը:
«Ազատություն» ռադիոկայանը նշում է, որ բանաձեւում 70-ամյա վաղեմության դեպքերը կոչվում են «էթնիկական զտումՙ ցեղասպանության նշաններով»: Փաստաթղթում ընդգծվում է, որ լեհերի բնաջնջման պատասխանատվությունն ընկնում է ուկրաինացի ազգայնականների կազմակերպությանՙ «Ուկրաինայի ապստամբական բանակի» վրա: Դրա մարտիկները հայտնի են նաեւ որպես բանդերականներ:
Բանաձեւում այն պնդումն է արվում, թե բանդերականների լեհ զոհերի թիվը հասնում է մոտ 100 հազարի:
«Լեհերը ձգտում են ուկրաինացիների հետ հաշտության եւ բարեկամության: Ի դեպ, իսկական հաշտությունը կարելի է կառուցել միայն ճշմարտության ու ոճրագործության համատեղ դատապարտման վրա», ընդգծում են բանաձեւի հեղինակները:
Ուկրաինայի «Ազատություն» ազգայնական կուսակցության ներկայացուցիչ Օլեգ Պանկեւիչը իր հերթին հայտարարել է, որ Լեհաստանի իշխանությունները պետք է խոստովանեն «Վիսլա» հանցավոր գործողությունը (լեհական տարածքներից ուկրաինացիների արտաքսումը 1947 թ.): Նրա կարծիքով, Վարշավայում պետք է ընդունեն, որ այդ իրադարձությունները եղել են «ուկրաինացիների էթնոցիդ»:
1920-ականների վերջերին ստեղծված ուկրաինացի ազգայնականների կազմակերպությունը հանդես էր գալիս էթնիկ ուկրաինացիներով բնակեցված տարածքներում միասնական պետության ձեւավորման օգտին: Դրա մարտական թեւը «Ուկրաինայի ապստամբական բանակն» էր: Երկրորդ աշխարհամարտի տարիներին «բանակի» ներկայացուցիչները համագործակցում էին հիտլերականների հետ, «բանակը» գործում էր կարմիրբանակայինների եւ պարտիզանների դեմ, ինչպես նաեւ իրականացնում էր պատժիչ գործողություններ քաղաքացիական բնակչության դեմ:
