ԳԱՅԱՆԵ ՄՈՒՐԱԴՅԱՆ
Օշականի Ս. Մեսրոպ Մաշտոց եկեղեցու «Խրիմյան կրթօջախում»
Սիլվա Տեր-Ստեփանյանի (Նյու Յորք, ԱՄՆ) նախաձեռնությամբ եւ հովանավորությամբ վեց տարի առաջ Արագածոտն մարզի Օշականի Ս. Մեսրոպ Մաշտոց եկեղեցում հիմնվեց «Խրիմյան կրթօջախը»: Այն իր գործունեության ողջ ընթացքում հետապնդել է գիտակրթական, հասարակական-մշակութային նպատակներ.
– Նպաստել հանրակրթական դպրոցում ստացած գիտելիքների ամրապնդմանը, լրացուցիչ դասընթացների միջոցով ուսումնասիրել գիտության, կրթության, մշակույթի, կրոնի հայ ականավոր գործիչների կյանքն ու անցած ուղին, առավել մանրամասնորեն ծանոթանալ նրանց ազգանվեր գործունեությանը.
– օժանդակել եւ նպաստել երեխաների աշխարհընկալմանը, ձեւավորմանն ու զարգացմանը, ապագա նպատակների որոշակիացմանը եւ դրանց իրականացմանը, ավելորդ բարդույթներից ազատվելուն:
Նախօրոք ծրագրված դասերն անցկացնում են Երեւանի տարբեր բուհերից հրավիրված մասնագետները, ովքեր հարց ու պատասխանի անմիջական զրույցի միջոցով սովորեցնում են երեխաներին ինքնուրույն մտածել եւ եզրահանգումներ կատարել: Դասախոսություններ են կարդացվում իրավագիտական թեմաներով` երեխաների իրավունքների եւ պարտականությունների վերաբերյալ, սովորեցնում են ճիշտ արտահայտվել, սեղանի սպասքից բարեկրթորեն օգտվել, կարողանալ անհրաժեշտության դեպքում բուժօգնություն ցուցաբերել, պահպանել անձնական հիգիենան, լրագրության հիմունքներ սովորել եւ այլն: Տարվա ընթացքում երեխաները պարտադիր այցելում են երեւանյան թանգարաններ ու պատկերասրահներ, ինչպես նաեւ լինում են Հայաստանյան պատմամշակութային տարբեր վայրերում:
Կրթօջախի դասերն ընթանում են շաբաթական մեկ անգամ` երեք ժամով, եկեղեցու դպրանոցում, որին կարող են մասնակցել նախակրթարանն ավարտած բոլոր երեխաները:
Առաջին իսկ տարվա արդյունքերն ամփոփելիս ուրախությամբ արձանագրվեց, որ գյուղի երեխաները չափազանց հետաքրքրված են եւ պատրաստակամորեն են մասնակցում դասերին, որն էլ մեծ հպարտություն է ներշնչում` սկսած գործը առավել հետեւողական ու շարունակական դարձնել հատկապես գյուղական միջավայրում:
Արդեն իսկ տեսանելի է, որ տարեցտարի նոր գաղափարներ են ծնվում եւ ի հայտ գալիս նորանոր ծրագրեր:
Օրերս վեցամյա ծրագրի ավարտական առաջին 5 շրջանավարտները հանդիսավոր պայմաններում Ս. Մեսրոպ Մաշտոց եկեղեցու հոգեւոր հայրերի, Իրմա եւ Սիլվա Տեր-Սոեփանյանների, գյուղի հասարակայնության, ծնողների, տնօրենուհի Կարինա Սարգսյանի, հյուրերի ներկայությամբ ստացան «Խրիմյան կրթօջախի» ավարտագրերը, Առաջնորդարանի վկայականները, եւ ԱՄՆ-ի Սուրբ Պետրոս համալսարանի վկայականները, իսկ 3-րդ տարվա 23 շրջանավարտներ ստացան ազգանշանները: Հոգեւոր հայրերի օրհնությունից հետո տեղի ունեցավ հյուրասիրություն:
Թերեւս ամենաէական եւ շոշափելի ձեռքբերումը այն էր, որ «Խրիմյան կրթօջախի» այս տարվա բոլոր հինգ շրջանավարտներն էլ դիմել են Երեւանի տարբեր բարձրագույն ուսումնական հաստատություններՙ ուսումը շարունակելու:
Բարի մուտք մեծ կյանք:
