Հունիսի 21-ին Հայաստանում առաջին անգամ կանցկացվի «Տարվա բժիշկ» մրցանակաբաշխությունը: Կառավարության որոշմամբ հունիսի 21-ն ընդհանրապես նշվում է որպես բուժաշխատողի օր: Իսկ առողջապահության նախարարի հրամանով 2013-ին արդեն հաստատվել են առողջապահության նախարարության «Տարվա բժիշկ» հանրապետական մրցույթի անցկացման կարգը, անվանակարգերը եւ հավակնորդներին ներկայացվող պահանջները: Սույն մրցույթը նպատակ ունի խրախուսելու Հայաստանի լավագույն բժիշկներին, ինչը կնպաստի մասնագիտության հեղինակության բարձրացմանը:
Երեկՙ ասուլիսի ժամանակ առողջապահության նախարարության աշխատակազմի կառավարման վարչության պետ Սամվել Սողոմոնյանը տեղեկացրեց, որ մրցույթն անցկացվել է 3 փուլով: Իսկ բուն մրցանակաբաշխությունը կլինի Ա. Սպենդիարյանի անվան օպերայի ու բալետի ազգային ակադեմիական թատրոնում: Միջոցառման գեղարվեստական մասի պատասխանատուն ռեժիսոր Սուրեն Թադեւոսյանն է, իսկ միջոցառմանը տեխնիկապես ու ֆինանսապես աջակցել է «Տարվա ապրանք» ՍՊԸ-ն:
