Ադրբեջանը դատական վարույթներում փորձում է իր գործողությունները ներկայացնել որպես պատրեազմի հետևանքներ, ցանկանում է քողարկել իր դիտավորությունները, բայց միջազգային ատյանները քաղաքական բանակցություններ չեն, որտեղ շահում է ավելի մեծ քաղաքական ռեսուրս ունեցողը, «Ադրբեջանի ագրեսիայի ազդեցությունը շրջակա միջավայրի վրա» խորագրով համաժողովին այս մասին հայտարարեց միջազգային իրավունքի մասնագետ Արա Ղազարյանը։
«Ինչո՞ւ է Ադրբեջանն այդքան վախենում դատական գործընթացներից. որովհետև ճշմարտությունը հեշտությամբ բացահայտվում է։ Միջազգային հանրության մոտ որևէ կասկած չկա, որ Արցախում բռնի տեղահանում է եղել, հետևապես վերադարձի իրավուք պետք է լինի։ Ադրբեջանը սա չի կարող հերքել։ Այլ նբան է, որ Ադրբեջանն ասում է, որ ադրբեջանցիներն էլ պետք է իրավունք ունենան վերադառնալ Հայաստան։
Ադրբեջանը հասկանում է, որ որքան ժամանակը հոսի, այս բեռն իր վրա ծանրանալու է, իրենք չեն էլ հերքում արցախցիների վերադարձի իրավունքը»,- նշեց բանախոսը։
Ըստ Արա Ղազարյանի՝ վերադարձի իրավունքը կապվում է հայրենիք գաղափարի հետ, քո սեփական երկիր վերադարձը։
«Դրա համար Ալիևը հանկարծ հիշեց «Արևմտյան Ադրբեջանի» մասին։ Այսինքն, նրան հուշեցին, որ եթե միայն գույքի վրա շեշտը դնես, որ գույք եք թողել Հայաստանում, հաջողության չեք հասնի, տեսական հիմքը թույլ է, իսկ եթե հայրենիք գաղափարը շահարկվի, որ «Արևմտյան Ադրբեջան» է եղել Հայաստանի տարածքում, ավելի լայն կարող եք ներկայացնել տեսական հիմքերը։
Իրականում չկա, կա միայն անշարժ գույք, որը թողել են ադրբեջանցիները Հայաստանի որոշ տարածքներում։ Ադրբեջանի քաղաքականությունն է»,- ասաց Արա Ղազարյանը։
Բանախոսը շեշտեց՝ Ադրբեջանը վախենում է դատական գործընթացներից, քանի որ վերադարձի իրավունքի հետ միասին պարզվելու է, որ Ադրբեջանը միջազգային հանցագործ պետություն է, բազում հանցագործություններ է կատարել, ընդհուպ մարդկության դեմ հանցագործություններ, դրա համար պահանջում է Հայաստանին հետ վերցնել իրավական գործընթացները։
«Վերադարձի իրավունքն ընդամնենը տուն վերադարձ չէ, վերադարձ է հայրենիք։ Հայրենիքը կապ չունի քաղաքացիության հետ, դա Մարդու իրավունքների եվրոպական կոնվենցիայի 8-րդ հոդվածի տասնյակ բաղադրիչներն են։ Մնում է այդ ամենը կիրառենք մեր աշխատանքով»,- նշեց նա։
