ՍԴ-ն իր որոշման վերջին հատվածում անդրադառնում է հանրաքվեին, բայց առանց նշելու, որ այս փաստաթուղթը (նկատի ունի սահմանազատման հանձնաժողովների կանոնակարգը) պետք է լինի։ Անգամ չի մանրամասնում, որ արձանագրությունները՝ սահմանների նկարագրության և այլն, առնվազն պետք է գնան հանրաքվեի։ Նշանակում է՝ ՍԴ-ն իր քողարկման լուծումներով քողարկել է այն զիջումները, որոնք առաջիկայում պատրաստվում են կամ հնարավոր է, որ ներկայացնեն Հայաստանին։ Այս մասին լրագրողների հետ զրույցում այսօր ասաց ԱԺ «Հայաստան» խմբակցության քարտուղար Արծվիկ Մինասյանը։
Հարցին՝ արդյոք սա կապում է ՄԱԿ-ում Փաշինյանի՝ Էրդողանի հետ հանդիպման հետ, Մինասյանը պատասխանեց, որ չի կարող ասել՝ արդյոք կապ կա, թե՝ ոչ։
«Բայց այն, ինչ ասել է Նիկոլ Փաշինյանը, թե եթե հակասի, ապա Սահմանադրություն կփոխենք, սա ոչ միայն խայտառակություն է, այլև միջազգային մակարդակում արժանապատվության նսեմացման բարձրագույն կետ է»,-ասաց պատգամավորը։
Նրա խորին համոզմամբ՝ ՍԴ-ն փորձում է բավարարել բոլոր կողմերին, բայց ստորադասում է Հայաստանի և հայ ժողովրդի շահերը։
«Սա շատ վատ բան է։ Արդյոք սա կարելի է դիտել որպես այնպիսի քայլ, որն անվերադարձ կամ անդառնալի կորուստ է բերելու Հայաստանին։ Իմ խորին համոզմամբ՝ ոչ, որովհետև իշխանափոխությունից հետո այս ամենն իրենց գնահատականը ստանալու է, այդ թվում՝ միջազգային քրեական արդարադատության շրջանակներում, և բոլորը կանգնելու են պատասխանատվության առաջ»,- ասաց Արծվիկ Մինասյանը։
