Խոսքը «Նեյշնլ փոստի» մասին է: «Դունյա բյուլթենի» կայքէջը, երեկ կանադական թերթի հրապարակմանն անդրադառնալիս, դա համարել է «նոր պահպանողականների» խոսափող, նշել է, որ վերջիններս առ այսօր Թուրքիային զինվորական հեղաշրջման սպառնալիքով կարգի հրավիրելու երազ են տեսնում:
Կարծիքը հաստատելու համար թուրքական կայքէջը առանձին հատվածներ է մեջբերում կանադական թերթի հրապարակումից, որը Թաքսիմի «Գեզի» այգու իրադարձությունները լուսաբանելիս ընդգծել է. «Թուրքիան դեռեւս տասնյակ տարիներ, նույնիսկ 100 տարի զինվորական հեղաշրջումների կարիքն է զգալու»:
Խնդրո առարկա հոդվածը գրի է առել Էմեթ Ռոբինսոնը: Նա գրել է. «Թուրքիան պետք է դառնա կառավարությունների ոտնձգությունները կանխարգելող, ազատություններին հարգանքով վերաբերվող ժողովրդավարական երկիր, նախկինում բանակը թեկուզ մասնակի այս ամենն ապահովում էր: Որքան էլ զինվորական հեղաշրջումներն անցանկալի լինեն ժողովրդավարական համակարգերի համար, այդուհանդերձ, ժողովրդավարության ասպարեզում Թուրքիայի նման չհասունացած երկրների համար Արեւմուտքի արժեքները իսլամական ոտնձգությունից պաշտպանելու միջոց կարող են դառնալ»:
Ըստ թուրքական կայքէջի, «Նեյշնլ փոստի» հեղինակ Ռոբինսոնը «Գեզի» այգու իրադարձությունները դիտարկել է որպես քեմալականության ոգու վերակենդանացում երկրում, ընդգծել է վարչապետ Էրդողանին «ծնկի բերելու» անհրաժեշտությունը, իսկ իրադարձությունները համարել քաղաքացիական հեղաշրջում:
