2014-ի երկրորդ կեսից գնաճը կվերադառնա նպատակային միջակայք
Կենտրոնական բանկի դրամավարկային քաղաքականությունը ներկայացնելովՙ ԿԲ խորհրդի անդամ Արթուր Ստեփանյանը երեկ նշեց, որ նկատի ունենալով երկրորդ եռամսյակի առաջարկի շոկերը` գազի եւ էլեկտրաէներգիայի սակագների բարձրացումը, ինչպես նաեւ կարկտահարության հետեւանքները, առաջիկա 1 տարվա ընթացքում գնաճի մակարդակը բարձր կլինի նպատակային միջակայքից:
Ըստ Արթուր Ստեփանյանիՙ եթե չլինեին այդ շոկերը, ապա գնաճի մակարդակը կլիներ 4 տոկոսի սահմաններում: Մինչդեռ դրանց առկայությամբ, առաջիկա մեկ տարին գնաճը կգտնվի 8 տոկոսի սահմաններում եւ միայն 2014-ի կեսերի կվերադառնա նպատակային միջակայք` 4 տոկոս գումարած-հանած 1,5 տոկոս:
ԿԲ խորհրդի անդամը հիշեցրեց, որ Հայաստանում բարձր գնաճ` մոտ 11 տոկոս, արձանագրվել էր 2011-ին, բայց կառավարության եւ Կենտրոնական բանկի համատեղ քայլերով որոշ ժամանակ հետո նվազեց եւ հասավ կանխատեսված նպատակային շեմին:
Էներգակիրները կազմում են սպառողական զամբյուղի 10 տոկոսը, հետեւաբար դրանց սակագների փոփոխությունը, տվյալ դեպքում բարձացումը, անմիջապես բերում է գնաճի: Արթուր Ստեփանյնաի կարծիքով, գնաճն ավելի փոքր կլինի այն շուկաներում, որտեղ կա մրցակցություն, իսկ ավելի կենտրոնացված շուկաներում գնաճի զսպման վրա պետք է ազդեցություն ունենա նաեւ տնտեսական մրցակցության պաշտպանության հանձնաժողովը: Սոցիալական հետեւանքները կանխելու համար կառավարությունը ձեռնարկելու է համապատասխան միջոցառումներ, այդ թվումՙ աշխատավարձերի բարձրացում:
Գնաճը համախառն ներքին արդյունքի վրա նույնպես բացասական ազդեցություն կունենա: ԿԲ կանխատեսմամբ, 2014-ին տնտեսական աճը կկազմի 4,7-5,9 տոկոս: Այն հարցին, թե երկրի նախագահի առաջադրած 7 տոկոս տնտեսական աճին հասնելու հետ ինչպե՞ս է համադրվում ԿԲ կանխատեսած ավելի ցածր տնտեսական աճը, Արթուր Ստեփանյանը պատասխանեց, որ Կենտրոնական բանկը, որպես ավելի պահպանողական կառույց, 1 տոկոսով ավելի ցածր տնտեսական աճ է կանխատեսում: Նա միաժամանակ ավելացրեց, որ այդ աճը կարող է ավելի բարձր լինել` կախված կառավարության կողմից իրականացվող արտահանմանն ուղղված արդյունաբերության զարգացման քաղաքականության արդյունավետությունից:
