Շահագործման է հանձնվել 1949թ.: Կայանի ջրընդունիչ կառույցները, տուրբինային ջրատարն ու կայանային շենքը տեղավորված են Հրագդան գետի ակունքում, Սեւանա լճի մերձափնյա լեռնային զանգվածում, լճի մակերեւույթից 100 մ խորության վրա: Կայանային շենքի մեքենայական սրահում տեղադրված են 34,2 ՄՎտ ընդհանուր հզորությամբ, 60 մ հաշվարկային ճնշումով, 70 մ3/վրկ ջրի ծախսով գործող երկու շառավղաառանցքային տուրբաագրեգատներ: ՀԷԿ-ի ստորին բիեֆում տուրբինների բլոկին հարկադրված է կողմնատար խուցը, որից սկիզբ է առնում 5,5 կմ երկարությամբ անճնշումային թունելը: Սեւանի ՀԷԿի հիդրոագրեգատներն ավտոմատացված են, գործում են առանց մշտական հերթապահ անձնակազմի:
Ետպատերազմյան հնգամյակի վերականգնեցված եւ նոր կառուցված հիդրավլիկական հզորություններից է: ԽՍՀՄ-ում առաջին ստորգետնյա հիդրոէլեկտրակայաններից մեկն էր: Սեւան ՀԷԿ-ը Սեւան-Հրազդան կասկադի առաջին աստիճանն է, որն իրականացնում է Սեւանա լճից ջրի ներհոսքը: Այն ներառում է.առափնյա ջրընդունիչ` հագեցած ձկների պաշտպանության համակարգով, ամփոփիչ ջրանցք,երկրորդ աստիճանի ջրընդունիչ, որն անմիջականորեն ջուր է վերցնում կայանի համար,ստորգետնյա տուրբինային ջրատար,կայանի ստորգետնյա կառույց,կողմնատար թունել,բարձրացնող ենթակայան,վերգետնյա ղեկավարման շենք:
Առափնյա ջրի ընդունիչ կայանը հագեցած է ձկների պաշտպանության համակարգով, իրենից ներկայացնում է երեք անցքերով, ձկները հավաքող երեք թունելով ջրի ընդունիչ սարք, որոնք միանում են ձկների հավաքման համակարգով, նորելուկ ձկների նետման թունելով: Առափնյա ջրի ընդունիչ կայանը ապահովում է Սեւանա լճից ջրի արտահոսքը դեպի ՀԷԿ եւ նորելուկ ձկների անվնաս նետումը ետ դեպի լիճ: Ունի մեծ բնապահպանական նշանակություն Սեւանա լճի համար:
Ջրահեռացման բլոկում տեղակայված են երկու ասեղային փական, որոնք հիդրոագրեգատների վթարային անջատման դեպքում ապահովում են անհրաժեշտ քանակի ջրի հոսքը հիդրոկայանի միջով: Սեւանա լճի ջրի մակարդակի` 15մ իջնելու պատճառով յուրաքանչյուր հիդրոագրեգատի առկա հզորությունը կազմում է 12,0 ՄՎտ: Կայանի շենքում կա նաեւ 320կՎտ հզորությամբ փոքր հիդրոագրեգատ: Այն ապահովում է Սեւան ՀԷԿ-ի վերաթողարկումը համակարգի մարման ժամանակ:
ՍՏԵՓԱՆ ՊԱՊԻԿՅԱՆ
Լուսանկարում՝ Սեւանի ՀԷԿ-ի սրահը
