Մեկնարկել է «Մեկ կադր 2013» կարճամետրաժ ֆիլմերի միջազգային փառատոնը, որի շրջանակում ցուցադրվում են մեկ րոպե տեւողությամբ կարճամետրաժ 340 ֆիլմ, որից 109` մրցույթում, 231-ը հատուկ ծրագրերով:
Փառատոնին մասնակցում են 50-ից ավել երկրներ` Հայաստան, ԼՂՀ, ԱՄՆ, Ավստրիա, Արգենտինա, Բելգիա, Բուլղարիա, Բրազիլիա, Բոսնիա եւ Հերցեգովինա, Գերմանիա, Եգիպտոս, Եթովպիա, Էստոնիա, Թուրքիա, Իսպանիա, Իսրաել, Իտալիա, Իրան, Իրաք, Լեհաստան, Լիբանան, Խորվաթիա, Կոլումբիա, Կիպրոս, Կանադա, Հունաստան, Հունգարիա, Հնդկաստան, Հոնկոնգ, Ճապոնիա, Մեքսիկա, Մոնտենեգրո, Ջամայկա, Նիդեռլանդներ, Նիգերիա, Շվեդիա, Շվեյցարիա, Չինաստան, Չիլի, Պորտուգալիա, Պերու, Պակիստան, Ռուսաստան, Ռումինիա, Սլովենիա, Սուդան, Սիրիա, Սերբիա, Վրաստան, Վիետնամ, Ուկրաինա, Ֆրանսիա, Ֆինլանդիա:
«Մեկ կադր» կարճամետրաժ ֆիլմերի փառատոնը բաց կինոֆորում է, որը հիմնադրվել է 2003 թվականին: Փառատոնի խորհրդանիշը Հայաստանի Գեղամա լեռներում գտնված 5000-ամյա ժայռապատկերից վերակերտված բրոնզաձույլ արձանիկն է, իսկ մրցութային անվանակարգերը` «Մեկ կադր-մեկ րոպե», «Կարճ ֆիլմեր» եւ «Կինո առանց սահմանների»:
Մրցութային անվանակարգերից «Մեկ կադր-մեկ րոպե»-ին մասնակցող ֆիլմը պետք է ստեղծված լինի առանց մոնտաժային միջամտության եւ տեւի 60 վարկյան: Այս դեպքում, երկու հիմնական սահմանափակումները փաստացի առավելություն են: Հեղինակը օժտված է կինոլեզվի տարրերից օգտվելու, առավել քիչ տեխնիկական, ֆինանսական ծախսերի ու ժամանակի օգտագործմամբ ամբողջական ֆիլմ արտադրելու բացառիկ հնարավորությամբ:
Ի դեպ, փառատոնը հեղինակներին աջակցում է սցենարի, նկարահանման եւ մոնտաժի խնդիրներում` տրամադրելով նաեւ անվճար տեխնիկա:
«Մեկ կադր» կարճամետրաժ ֆիլմերի փառատոնը աջակցում է Հայաստանում անկախ, հեղինակային կինոարտադրության զարգացմանը, եւ չկան սահմանափակումներ նկարահանման տեխնիկայի, կրիչի հետ կապված: Ֆիլմերը կարող են նկարահանվել հնարավոր բոլոր միջոցներով` բջջային հեռախոսից մինչեւ կինոժապավեն եւ թվային խցիկ:
Փառատոնի ամփոփումը տեղի կունենա հունիսի 9-ին:
