Երեւանի քաղաքապետարանը Հանրապետության հրապարակի վերակառուցման հայեցակարգային բաց մրցույթ էր հայտարարել, որին բուռն արձագանքեցին հանրությունն ու լրագրողները: Երեկ Ազգային ժողովում Երեւանի բյուջեի կատարողականի ներկայացումից հետո Երեւանի փոխքաղաքապետ Կամո Արեյանը պարզաբանումներ արեց այս հարցի առթիվ: Պատասխանելով պատգամավորական մտահոգությանը` նա նշեց, թե ընդամենը առաջարկներ ներկայացնելու մրցույթ-առաջարկ է, ու որ այդպես բուռն են արձագանքել` գուցե վերնագրի ձեւակերպումն է սխալ: Ոչ թե հրապարակը վերակառուցվելու է, այլ ստորգետնյա հատվածի, տրանսպորտի անցումների ծանրաբեռնվածության եւ նախկին արձանի (Լենինի-Մ.Խ.) բաց մնացած հատվածի հետ կապված առաջարկներ ներկայացնելու շուրջն է մրցույթը, պարզաբանեց Արեյանը: Պատգամավորն էլ ( Նիկոլ Փաշինյանը ) իր մտահոգությունն ավելի բացեց, թե արդյոք նոր ինչ-որ արձան կառուցելո՞ւ հարց է, կամ միգուցե այն մտահոգությունն է առարկայանում, թե հրապարակի կառույցների հետեւի շենքերը բարձրացել եւ ճնշում են բուն հրապարակը, ու միգուցե հրապարակի շենքերն էլ են բարձրացնելու: Չէ, Արեյանը պնդեց իր վերն ասված խոսքը: Մենք էլ հիշեցնենք, որ ժամանակին հրապարակի մի հատվածը նստել էր` բացելով մոտ երկդարյա հնության ճանաչողական նշանակության ստորգետնյա կառույցներ, որոնք կոնսերվացվեցին: Եվ սա գտնվում է հրապարակի` դեպի արտգործնախարարություն հատվածում:
Ավելի ուշ Երեւանի գլխավոր ճարտարապետ Նարեկ Սարգսյանի ստորագրությամբ մի հայտարարություն տարածվեց, որտեղ պարզաբանվում է, թե մրցույթի անցկացման նպատակը մասնագետների գաղափարներն ու նախագծային առաջարկները հավաքել-մեկտեղելն է` Հանրապետության հրապարակի վերակառուցման հայեցակարգային մոտեցումների առումով:
Նշենք, որ սոցիալական ցանցերում տարածվում էր դժգոհության ալիք առ այն, որ Երեւանում բազմաթիվ խնդիրներ կան, մինչդեռ քաղաքապետարանը պատրաստվում է վերակառուցել կենտրոնն ու միլիոններ ծախսել` Երեւանի ծայրամասերի օրհասական խնդիրներով չմտահոգվելով:
