Ֆուտբոլի աշխարհի առաջնության ընտրական մրցախաղում Դանիայի հավաքականի նկատմամբ տոնած տպավորիչ հաղթանակի շնորհիվ Հայաստանի ազգային հավաքականը ՖԻՖԱ-ի դասակարգման աղյուսակում մեծ առաջընթաց է ունեցելՙ բարձրանալով միանգամից 23 տեղով: Այժմ մեր ընտրանին 66-րդ հորիզոնականում է:
Իր հերթին Մալթայի հավաքականը, որն անսպասելիորեն հաղթել էր մեր ընտրանուն, 23 տեղով առաջադիմել է եւ հանգրվանել է 133-րդ հորիզոնականում: Իսկ ամենամեծ առաջընթացն ունեցել է Սենեգալի հավաքականը, որը 25 հորիզոնականով բարձրացել ու զբաղեցնում է 74-րդ տեղը:
Կոնֆեդերացիաների գավաթի խաղարկությունում տոնած հաղթանակի շնորհիվ Բրազիլիայի ընտրանին 13 տեղով բարձրացել ու հանգրվանել է 9-րդ հորիզոնականում: Իսկ ահա իսպանացիները պահպանել են ցուցակի առաջատարի դիրքը: 2-րդ տեղում է մնացել Գերմանիան, իսկ եռյակը եզրափակող Կոլումբիայի ընտրանին 4 տեղով բարձրացել է: Լավագույն տասնյակում են նաեւ Արգենտինայի, Հոլանդիայի, Իտալիայի, Պորտուգալիայի, Խորվաթիայի եւ Բելգիայի ընտրանիները:
Նախկին ԽՍՀՄ հանրապետությունների հավաքականներից ամենաբարձր վարկանիշն ունի Ռուսաստանը, որը նահանջել է 6 տեղով եւ հանգրվանել է 17-րդ հորիզոնականում: Մյուս հավաքականների ցուցանիշներն այսպիսին են. 28. Ուկրաինա, 58. Ուզբեկստան, 78. Բելառուս, 86. Էստոնիա, 98. Վրաստան, 104. Լիտվա, 106. Տաջիկստան, 117. Ադրբեջան, 119. Լատվիա, 125. Մոլդովա, 136. Թուրքմենստան, 137. Ղրղզստան, 150. Ղազախստան:
