Թուրքիայի փոխվարչապետ Բեշիր Աթալայը հուլիսի 3-ին հերքել է իրեն վերագրված այն խոսքերը, թե երկրում բողոքի զանգվածային ցույցերի կազմակերպիչը հրեական համայնքն է: Այդ մասին հաղորդում է Hurriyet Daily News կայքէջը:
Փոխվարչապետի մամլո ծառայությունում ասել են, թե Աթալայը հրեաներին վիրավորելու մտադրություն չի ունեցել: Նրա օգնականների տվյալներով, Աթալայի խոսքերը սխալ են մեջբերվել եւ կտրվել են համատեքստից, ինչը դրանց հաղորդել է նոր հնչողություն, գրում է Today՛s Zaman թերթը:
Նախօրեին թուրքական ԶԼՄ-ները տարածել էին Աթալայի տեսագրված հայտարարությունները, որոնցում նա օտարերկրյա ուժերին եւ հրեական համայնքին մեղադրել է Թուրքիայում զանգվածային ելույթների կազմակերպման մեջ: Իսրայելական newsru.il կայքէջը մանրամասնում է, որ կառավարող «Արդարություն եւ բարգավաճում» կուսակցության շրջանային բաժանմունքներից մեկումՙ Աթալայն ասել է, թե Թուրքիայից փախած որոշ հրեաներ նախանձում են երկրի արագ վերելքին եւ «փորձում են դրան խանգարել»:
Թուրքական Sabah թերթը հաղորդում է, որ Իսրայելն արդեն հակազդել է Աթալայի հայտարարություններին: Թուրքիայի վարչապետ Ռեջեփ Թայիփ Էրդողանիՙ Գազայի հատված եւ Ռամալլահ կատարելիք այցից առաջ ժամանակավորապես դադարեցվել է Իսրայելի մուտքի արտոնագրի տրամադրումը Թուրքիայի քաղաքացիներին: Անկարայում Իսրայելի դեսպանը արդեն համապատասխան հրահանգ է ստացել իր երկրի ԱԳՆ-ից:
