Լոս Անջելեսից Քրիստոֆեր Ռեյնոլդսը տեղեկացնում է, որ Մեթյու Կարանյանի «Հայաստան եւ Ղարաբաղ» 320-էջանոց ուղեցույցը այնքան մեծ պահանջարկ ունի, որ վերջերս երրորդ անգամ է հրատարակվել: Հարտֆորդում (Կոնեկտիկուտ) ծնված եւ մեծացած ամերիկահայը Հայաստան կատարած բազմաթիվ այցելություններից հետո է ձեռնարկել գրել այդ ուղեցույցը (լուսանկարներըՙ Կարանյանի եւ Ռոբերտ Քյուրքչյանի), որպեսզի ամերիկացիներին ծանոթացնի շատերի համար դեռեւս «terra incognita» համարվող մեր հայրենիքը:
Կարանյանը անշուշտ իմացել էր, որ իր տատիկն ու պապիկը Մ. Նահանգներ են եկել մոտ հարյուր տարի առաջ, բայց Հայաստանում կատարած ուսումնասիրությունների ժամանակ է միայն տեղեկացել, որ իր ազգակից Մարտիրոս Խերանյանը եղել է ճանաչված քարտեզագիր, որ նա է 1928-ին գծել պատմական Հայաստանի մանրամասն քարտեզը:
Կարանյանն այժմ ապրում է Փասադենայում, իրավաբան է մասնագիտությամբ: Հայաստանում նախասիրած վայրերն են Հաղպատն ու Սանահինը, իսկ Արարատը նախընտրում է դիտել Խոր Վիրապից:
