Հայ ծրագրավորողների նամակը ՀՀ Կենտրոնական բանկի նախագահ Արթուր Ջավադյանին
«Հայ ծրագրավորողներ» ստորագրությամբ մեր թերթի միջոցով ՀՀ ԿԲ նախագահ Արթուր Ջավադյանին հետեւյալ բովանդակությամբ նամակն են հղել.
«Խնդրում ենք տեղեկացրեք, թե ինչու Google ընկերությունը չի համագործակցում հայկական բանկերի հետ, որի հետեւանքով Google Adsense-ի հայաստանցի բաժանորդների վաստակած գումարները բանկային փոխանցումով չի փոխանցվում Հայաստան: Փոխարենը փոստային առաքումով 2-3 ամսվա ընթացքում ուղարկվում է Citibank-ի չեկ, որը հայկական բանկերը հրաժարվում են կանխիկացնել, նրանցից մեկն էլ կանխիկացնելու համար պահանջում է, որ առնվազն 1 տարի լինես իրենց բանկի հաճախորդ: Այս պայմանը բավարարող երջանիկ այցելուն ստիպված է եւս 1-2 ամիս սպասել եւ ահռելի միջնորդավճար վճարել գումարը ստանալու համար: Մինչդեռ հասարակ բանկային փոխանցումը կտեւեր ընդամենը 1օր:
Մենք` հայաստանցի երիտասարդ ծրագրավորողներս, Ձեզ խնդրում ենք, որ քայլեր ձեռնարկեք Google-ի հետ բանակցելու եւ այս խնդիրը լուծելու համար:
Դա հնարավորություն կստեղծի, որ արտասահմանից Հայաստան լուրջ փողեր ներհոսեն, կօգնի ծրագրավորողներին կայանալ եւ զարգանալ Հայաստանում, եւ որոշ չափով կկրճատի լավ մասնագետների արտագնա աշխատանքը:
Հ. Գ. Ոչ պակաս կարեւոր խնդիր է եւ ամոթ է մեր երկրի համար, որ 2013-ին մենք չենք կարող նորմալ օգտվել նաեւ PayPal համակարգից»:
