Երեւանի կենտրոնում բացվեց «Թուֆենկյան ավանդական Երեւան» հյուրանոցը
Երեւանի կենտրոնում երեկ բացված «Թուֆենկյան ավանդական Երեւան» հյուրանոցը Հայաստանում Ջեյմս Թուֆենկյանի ազգային ճարտարապետական ոճով կառուցած հերթական` 4-րդ հյուրանոցային համալիրն էր: 2001-ից «Թուֆենկյան Հոսփիթալիթի» ընկերությունը նման հյուրանոցներ է կառուցել Սեւանա լճի ափին գտնվող Ծափաթաղ գյուղում, Լոռու մարզում եւ Դիլիջանում: Երեւանում բացված հյուրանոցի նախագծմանը մասնակցել են հայ եւ ամերիկյան հայտնի ճարտարապետներ եւ դիզայներներ, հյուրանոցը կառուցվել է 20-րդ դարասկզբի Երեւանի ճարտարապետական ոճով` հիմնականում սեւ տուֆից: Հյուրանոցն ունի 85 համարներ, կոնֆերանսների դահլիճ, կարող է ընդունել 200 զբոսաշրջիկների, մինչեւ 2014-ը կունենա լողավազան, մարզասրահ, գորգերի վաճառքի սրահ:
Խոսելով Հայաստանում իր գործունեության մասինՙ Ջեյմս Թուֆենկյանը լրագրողներին ասաց, որ ինքը Հայաստան է եկել անկախությունից հետո` նպատակ ունենալով օգնել երկրի տնտեսության զարգացմանը: Ինչ վերաբերում է հյուրանոցների ազգային ճարտարապետական ոճին, ապա նա այն կարծիքը հայտնեց, որ զբոսաշրջիկների համար հետաքրքիր չի լինի, եթե իրենք գան Հայաստան եւ իրենց զգան, ինչպես, ասենք, Լոս Անջելեսում: «Մարդը պետք է գա Հայաստան եւ զգա, որ Հայաստանում է, զգա յուրահատկությունը», նշեց նա: Ըստ Ջեյմս Թուֆենկյանիՙ «Թուֆենկյան ավանդական Երեւան» հյուրանոցում առաջարկվում են 4-5-աստղանի հյուրանոցի ծառայություններ 3-աստղանի հյուրանոցի գներով: Հյուրանոցի հիմնադիրը նշեց, որ իրենց բրենդը հայտնի է նաեւ Վրաստանում, եւ հնարավոր է, որ այնտեղ եւս հյուրանոց ունենան, քանի որ շատ հաճախ զբոսաշրջիկները տարածաշրջան են այցելում: Ջեյմս Թուֆենկյանի համոզմամբ, եթե իրենք հյուրանոց բացեն Վրաստանում, ապա դա կնպաստի նաեւ դեպի Հայաստան զբոսաշրջիկների թվի ավելացմանը:
Հյուրանոցի բացմանը մասնակցած Երեւանի քաղաքապետ Տարոն Մարգարյանը ողջունեց նման հյուրանոցի բացումը Երեւանում: Նա տեղեկացրեց, որ Երեւանում 50 հյուրանոցներ կան եւ 50 մոթելներ, բայց զբոսաշրջային հոսքը պահանջում է, որ դրանց թիվն ավելանա: Քաղաքապետի տեղեկացմամբ, սկսած 2010-ից` տարեկան 100 հազարով ավելանում է Երեւան այցելող զբոսաշրջիկների թիվը: Նա նաեւ կարեւորեց «Թուֆենկյան ավանդական Երեւան»-ի կառուցումը որպես ներդրումային ծրագիր:
Էկոնոմիկայի փոխնախարար Արա Պետրոսյանի գնահատմամբ, ավանդական ոճով հյուրանոցները շատ գրավիչ են ոչ միայն Հայաստանում, այլեւ ցանկացած միջավայրում: Դրանք կառուցում են տեղական շինանյութերով, տեղական ճարտարապետական ոճով, մատուցվում են տեղական խոհանոցի ուտեստներ, ինչի շնորհիվ, ըստ փոխնախարարի, մարդիկ հաղորդակից են լինում տվյալ երկրի միջավայրին: «Թուֆենկյան» հյուրանոցների դեպքում ազգային ավանդական ոճը զուգակցվում է միջազգային բարձր չափանիշների հետ: Արա Պետրոսյանն այն կարծիքին է, որ «Թուֆենկյանը» շուտով կդառնա հանրաճանաչ միջազգային բրենդ: Նրա տեղեկացմամբ, այս տարի Հայաստանում կառուցվելու է եւս 4-5 հյուրանոց, այդքան էլ` եկող տարի:
Հյուրանոցի բացմանը մասնակցեց երկրի նախագահ Սերժ Սարգսյանը: Նա շրջեց հյուրանոցում, ծանոթացավ հյուրանոցային համարների պայմաններին եւ առաջարկվող ծառայություններին:
«Զարգացող երկրներում բիզնես անելը հեշտ չէ»
Այն հարցին, թե ինչպե՞ս է գնահատում Հայաստանում բիզնես գործունեությունը, Ջեյմս Թուֆենկյանը պատասխանեց, որ ինքը բիզնես ունի Չինաստանում, Նեպալում, եւ զարգացող երկրներում բիզնես անելը հեշտ չէ: Ըստ գործարարի, Հայաստանում շահութաբերություն կա, բայց դա այնքան էլ բարձր չէ:
Մեկ այլ հարցի առնչությամբ Ջեյմս Թուֆենկյանը հայտնեց, որ Հայաստանում գորգերի արտադրության իր գործունեությունը չի դադարեցրել: Սակայն այն զգալիորեն անկում է ապրել, երբ դոլարի փոխարժեքը 580 դրամից իջավ մինչեւ 300 դրամի: Հիմա, երբ 400 դրամից ավելի է, այդ արտադրությունը նորից կվերականգնվի, բայց պետք է ավելացնել նաեւ աշխատավարձերը: Նա նշեց, որ պլանավորում են ավելացնել գորգերի արտադրության ծավալները, ինչին կնպաստի նաեւ հյուրանոցում գորգերի վաճառքի սրահի բացումը:
