ՆԵՐԳԱՂԹՅԱԼՆԵՐՆ ԱՐԴԵՆ ԿԱԶՄՈՒՄ ԵՆ ՖՐԱՆՍԻԱՅԻ ԲՆԱԿՉՈՒԹՅԱՆ 20 ՏՈԿՈՍԸ

Պ. Ք.

Վերջին տասնամյակներին Ֆրանսիան հայտնվել է միգրացիոն հոսքերի խաչմերուկում: Ներկայումս երկրի 66 միլիոնանոց բնակչության գրեթե 20 տոկոսը կազմում են առաջին սերնդի ներգաղթյալները կամ նրանց անմիջական ժառանգները: Ներգաղթյալների մեծամասնությունը սերում է Հյուսիսային եւ Հասարակածային Աֆրիկայի նախկին ֆրանսիական գաղութներից, նշում է Ռոյթեր գործակալությունը: Սակայն երկրում ամենամեծ համայնքը իտալականն էՙ գրեթե 5 միլիոն մարդ: Հայերն արդեն միջնադարում հայտնի էին Ֆրանսիայում, բայց հայկական համայնքը ստվարացավ հատկապես 20-րդ դարասկզբին եւ ներկայումս կազմում է մոտ 500 հազար մարդ: Ինչ վերաբերում է նորագույն շրջանի ներգաղթյալներին, մանավանդՙ մահմեդական ժողովուրդներին, նրանք դժվարությամբ են ընդունում ֆրանսիական հասարակության արժեքները, ինչը մի շարք դեպքերում հանգեցնում է հակամարտությունների (օրինակՙ հագուստի հարցում): Բացի դրանից, Ֆրանսիան ձգողության կետերից մեկն է աշխարհի զանազան տարածաշրջաններից եկող եւ ապաստան հայցող փախստականների համար: Երկիրը նաեւ իբրեւ տարանցիկ կետ են օգտագործում անօրինական ներգաղթյալները, որոնք փորձում են Լա Մանշը հատելով անցնել Մեծ Բրիտանիա: Ամեն տարի Ֆրանսիա է մուտք գործում միջին հաշվով 200 հազար ներգաղթյալ: