Ինչպես տեղեկացրել է «Հարավկովկասյան երկաթուղի» ընկերությունը, Երեւան-Գյումրի-Երեւան էլեկտրագնացքի եւ Երեւան-Բաթում-Երեւան երթուղում գործող «Արմենիա» ֆիրմային գնացքի ուղեւորներն արդեն կարող են օգտվել անվճար «Ուայ-Ֆայ» կապից: «Արմենիա» ֆիրմային գնացքում դեռ անցած ամսին այն սկսել է գործել ննջավագոններում, իսկ նշված էլեկտրագնացքում հասանելի է բոլոր վագոններում:
Անլար համացանցային կապի գործարկումը, ընկերության կայքէջի փոխանցմամբ, երկաթուղու կողմից ուղեւորների սպասարկման եւ գնացքներում հարմարավետության մակարդակի բարձրացման վարվող քաղաքականության տարրերից մեկն է: Մեր կողմից նկատենք, որ լավ կլիներ արդիական այս նորույթի հետ մեկտեղ լուծվեր նաեւ գնացքում բոլոր ժամանակների համար կարեւոր մի հասարակ զուգարան ունենալու հարցը:
Գյումրին երկաթուղային կարեւոր հանգույց է մեր հանրապետությունում` այս ոլորտում ունեցած հարուստ պատմությամբ ու ավանդույթներով: Քաղաքի երկաթգծի կայարանի տարածքում շուտով հետաքրքրվողներին կներկայանա երկաթուղու բացօթյա թանգարան, որտեղ ցուցադրված կլինեն ավելի քան հարյուրամյա հին շոգեքարշ եւ ուղեւորատար վագոն: Դրանց տեղադրման աշխատանքը սկսվել էր հուլիսի 2-ից: Ըստ տեղեկությունների, օգոստոսի 4-ին այստեղ է շուքով նշվելու է Երկաթուղայինի օրը:
