Շարունակելով անցյալ տարվա նախաձեռնությունը, այս տարվա ապրիլի 15-19-ը Կանադայում գործող Զորյան ինստիտուտը (Տորոնտո) Արիզոնայի (Մ. Նահանգներ) պետհամալսարանում Ռոզինբլաթ ընտանիքի բարեգործական հիմնադրամի հովանավորության ներքո անցկացնելու է Ցեղասպանության իրազեկման շաբաթ, որի ընթացքում տեղի են ունենալու դասախոսությունների շարք, ցուցահանդեսներ եւ անհատական ելույթներ վերապրողների, քաղաքագետների եւ հետազոտող մասնագետների կողմից: Նրանք անդրադառնալու են ներկայիս աշխարհին սպառնացող վայրագություններին եւ ցեղասպանական արարքներին դիմակայելու հարցերին, չմոռանալով հարգանքի պատշաճ տուրք մատուցելու անցյալի նահատակներին:
Առաջիկա հինգշաբթի օրը կազմակերպվելու են երկու քննարկումներ, որոնցից առաջինը, համադրող դոկտ. Բարլոու Տեր-Մկրտիչյանի ղեկավարությամբ, նվիրված է լինելու «Հավաքական եւ պետական վայրագությունները Թուրքիայում» խորագրով գրքին, որը խորամուխ է լինում Թուրքիայում ազգայնամոլության ձեւավորման եւ փոքրամասնությունների (ալեւիների, հայերի, հույների, հրեաների, քուրդերի, եզիդիների, եւայլն) նկատմամբ նրանց վերաբերմունքի խնդիրներին, որպես «ներքին թշնամիների»: Քննարկմանը մասնակցելու են գրքի 16 հեղինակներից երեքը՝ դոկտ. Այշենուր Կորքմազը (Նիդեռլանդների առաջավոր Ուսումնասիրությունների ինստիտուտից, NIAS), դոկտ. Դեյվիդ Գաունտը (Կալգարի համալսարանից) եւ դոկտ. Համիտ Բոզարսլանը (հասարակագիտական առարկաների բարձրագույն ուսումնասիրությունների վարժարանից, EHESS):
«Բնաջնջում եւ վերակենդանացում բնիկ լեզուների եւ մշակույթի» վերնագրով համեմատական վերլուծությունների երկրորդ քննարկմանը (համադրող Կարին Ջարրաթ Սնայդերի ղեկավարությամբ) մասնակցելու են Լորենա Ֆոնտեյնը (Ուինեպեկի համալսարանից), Լորի Խաչատուրյանը (Կոռնել համալսարանից) եւ Թալար Շահինյանը (Իրվին համալսարանից): Նրանք քննարկում են փոքրամասնությունների իրավազրկման խնդիրները Կանադայում, Մ. Նահանգներում, Արեւմտյան Հայաստանում եւ Արցախի Հանրապետությունում:
Բացի այս զույգ գիտաժողովներից, Զորյան ինստիտուտը շարունակում է իր առաքելությունը միջնակարգ դպրոցների 10-12 դասարաններում «Հավասարություն, հանդուրժողականություն, հաշտեցում եւ իրազեկում» ցեղասպանագիտական կրթական ծրագրի միջոցով: Ծրագրի վարիչն է Զորյան ինստիտուտի վարչական մարմնի փոխնախագահ պրոֆ. Ալեքս Ալվարեսը:
Պատրաստեց՝ Հ. ԾՈՒԼԻԿՅԱՆԸ
(The Armenian Mirror-Spectator)
