ՀՀ գործող իշխանությունները հրաժարվում են պատասխանատվություն կրել իրենց արարքների, պատերազմում գրանցած պարտության համար՝ ամեն ինչում մեղադրելով Ռուսաստանին և նախկիններին։ Բայց արդեն վեց տարի է՝ բոլորս տեսնում ենք ձախողում ձախողման հետևից. 90-ականների մեր փառահեղ հաղթանակն այս իշխանության ձեռամբ դարձել է առ ոչինչ։ Azg.am-ի թղթակցի հետ զրույցում նման տեսակետ հայտնեց քաղաքագետ Արթուր Խաչիկյանը՝ անդրադառնալով Նիկոլ Փաշինյանի՝ Եռաբլուրում Վազգեն Սարգսյանի հիշատակին այսօր հարգանքի տուրք մատուցելուն։
«Մեր զոհերը, փաստորեն, դարձան առ ոչինչ, Արցախը հանձնվեց, 120 հազար հայ իր հայրենիքից տեղահանվեց, և այս ամենի մասին այլևս ոչ ոք չի խոսում։ ՀՀ իշխանությունները խոսում են միայն այն մասին, որ պետք է ենթարկվել Թուրքիային»,- ասաց քաղաքագետը։
Արթուր Խաչիկյանը դժվարացավ ասել, թե սպարապետ Վազգեն Սարգսյանի 65-ամյա հոբելյանի առթիվ ինչ խղճով է Նիկոլ Փաշինյանն այսօր այցելել «Եռաբլուր» զինվորական պանթեոն:
Մեր զրուցակցի խոսքով՝ անհասկանալի է, թե ինչպես է այդ անձը դա կարողացել։
«Եթե ես լինեի այդպիսի դիրքում (Աստված չանի, որ այդպիսի բաներ արած լինեի), գոնե ամբողջ հասարակության առջև ներողություն կխնդրեի Վազգեն Սարգսյանից։ Ներողություն կխնդրեի, որ նրա բոլոր հաղթանակներն ու նվաճումները դարձրել եմ առ ոչինչ։
Բայց դրա համար պետք է արժանապատվություն, տղամարդկություն ունենալ. բոլորը չէ, որ այս որակներն ունեն։ Շատ ավելի հեշտ է անընդհատ մեղադրել ինչ-որ մեկին, այլ պետության, այլ կենտրոնի և վերահոսկողության տակ պահել իշխանական PR խմբին, որն անընդհատ ամբողջ հանրապետությունով մեկ տարածում է սուտ լուրեր, սուտ բեմադրություններ, ներշնչում է սուտ հույսեր, որ Արևմուտքը կգա և կփրկի մեզ»,- նշեց մեր զրուցակիցը։
Այս ամբողջ սուտը և բեմականացումները, Արթուր Խաչիկյանի համոզմամբ, ժողովրդի ուշադրությունը շեղելու միտում ունեն, մինչդեռ առկա է ռեալ վտանգ, և չի բացառվում, որ թշնամու կողմից կրկին հարձակում լինի։
«Իշխանությունների այս գործողություննների հետևանքով մենք մնում ենք անպաշտպան։
Չգիտեմ՝ եթե Վազգեն Սարգսյանն այժմ ողջ լիներ, ի՞նչ կասեր Նիկոլ Փաշինյանին և նրա թիմակիցներին։ Ինչպե՞ս կարտահայտվեր Վազգեն Սարգսյանն այն մասին, որ Եռաբլուրում ծեծելով քարշ էին տալիս զոհված զինծառայողների ծնողներին։ Ժողովուրդը նման իշխանությունների մասին ասում է՝ «Հաստ կաշի ունեն»»,- ամփոփեց Արթուր Խաչիկյանը։
Հիշեցնենք, որ ՀՀ քաղաքական վերնախավը Վազգեն Սարգսյանի 65-ամյա հոբելյանի առթիվ այսօր այցելել է «Եռաբլուր» զինվորական պանթեոն:
Հանրապետության վարչապետը և նախագահը ծաղիկներ են խոնարհել Վազգեն Սարգսյանի շիրիմին և հարգանքի տուրք մատուցել նրա հիշատակին:
