Բայց դա չի լուծի 10.000 դրամի «մախինացիան»
Վերջերս «Ազգ»-ն ահազանգ էր ստացել քաղաքացիներից, որ «Շատապօգնություն» ծառայությունը կրկնակի գումար աշխատելու ձեւ է գտել: Բանն այն է, որ ծառայությանը կանչ տված քաղաքացիները, եթե ցանկանում են իրենց նախընտրած հիվանդանոցը տեղափոխվել, ծառայությանը պետք է 10.000 դրամ վճարեն: «Բայց լինում է նաեւ այնպես, որ բուժաշխատողները գումարը վերցնում են, այնուհետեւ ծառայությանը ներկայացնում, որ ոչ թե քաղաքացու ցանկությամբ, այլ իրենց նախաձեռնությամբ են օգնության կարիք ունեցողին այս կամ այն հիվանդանոց տեղափոխել: Եվ, փաստորեն, բուժաշխատողը ոչ միայն «Շտապօգնություն» ծառայության բյուջեից է աշխատավարձ ստանում, այլ իրեն է մնում նաեւ քաղաքացու վճարած 10 հազար դրամը»,- ասաց «Ազգ»-ի զրուցակիցը:
Դիտարկմանը, թե բուժառուները փողի հետ գործ չունեն եւ գումարը վճարում են բացառապես էլեկտրոնային եղանակով, մեր զրուցակիցը հակադարձեց. «Քաղաքացիներից ոչ բոլորն են տեղյակ առցանց վճարման մասին: Եվ չի բացառվում, որ նրանք գումարը բժշկին կամ բուժքրոջն են տալիս, որ վերջիններս մուտք անեն: Ինքներդ էլ հասկանում եք, որ շտապօգնության բրիգադը քաղաքացուց վերցրած գումարը կարող է մուտք չանել, վերադասներին էլ ներկայացնել, որ, օրինակ, մահճակալ չլինելու պատճառով՝ իրենք (եւ ոչ թե քաղաքացին) են որոշել քաղաքացուն, օրինակ, Էրեբունուց Մալթաիա-Սեբաստիա տեղափոխել»:
«Շտապօգնություն» ՓԲԸ տնօրեն Ռուբեն Գրիգորյանը վստահեցնում է՝ վաղվանից՝ մարտի 1-ից, կիրառության մեջ մտնող օնլյան համակարգը կբացառի նման դեպքերը: Ինչպե՞ս, «Ազգ»-ի հետ զրույցում բացատրում է. «Շտապօգնության թերթիկները կիրառությունից դուրս են գալիս, քաղաքացու մասին բոլոր տեսակի տվյալները գրանցվելու են առցանց համակարգում՝ պլանշետով: Ոչ թե բժիշկն է որոշելու՝ ո՞ր հիվանդանոց տեղափոխել հիվանդին, այլ՝ համակարգում այդ մասին ծանուցում է գալու: Իսկ եթե պացիենտը ցանկանա գումար վճարել եւ իր ցանկացած բուժհաստատություն տեղափոխվել, դա հնարավոր կլինի իրականացնել նաեւ հենց նույն համակարգի միջոցով»:
Ծառայության թվայնացումը, իհարկե, վատ չէ, ու մեկ քայլ առաջ է տեղեկատվական տեխնոլոգիաների՝ անընդհատ զարգացող ժամանակներում, բայց ո՞րն է երաշխիքը, որ բուժաշխատողը, վերոնկարագրյալ՝ գումարը վերցնելու, բայց մուտք չանելու «մեխանիմզը բանեցնելով» չի առաջնորդվելու նաեւ այս դեպքում:
ՍԵՎԱԿ ՎԱՐԴՈՒՄՅԱՆ
