Մոտ մեկ ամսից Հայաստանը կհյուրընկալի ապագա տիեզերագնացներին եւ նրանց այստեղ կնախապատրաստի դեպի Մարս թռիչքին: Հայաստանում անցկացվելիք սիմուլյացիայի տեղեկությունը տարածվել էր մի քանի ամիս առաջ: «Ազգ»-ին հայտնի է դարձել, որ դեպի Մարս թռիչքի եւ այնտեղի աշխատանքի պայմանները նմանակող բազայի բացման արարողությունը տեղի կունենա մարտի 15-ից հետո (նախնական՝ 17-18-ին), ինչին ներկա կլինեն նախապես հրավեր ստացածները: Ովքե՞ր կլինեն «ընտրյալները», կազմակերպիչները հստակ չեն պատասխանում:
«Կարող ենք ասել միայն, որ առաջին օրն է տեղանքի ինչ-որ հատված բաց լինելու ներկաների համար, այնուհետեւ մեկ ամսով այն փակվելու է, որպեսզի ապագա տիեզերագնացները հնարավորինս մոտ ու նույնական զգան, ապրեն այն ամենը, ինչ կա եւ տեսնելու են Մարսում»,- ասաց մեր զրուցակիցը:
«Ազգ»-ին հայտնի դարձավ նաեւ, որ սիմուլյացիան տեղի է ունենալու Արարատի մարզում: «Կազմակերպիչները մի քանի ամիս շրջել են Հայաստանի տարբեր մարզերում, տարբեր տարածքներ ուսումնասիրել, բայց կանգ են առել Արարատի մարզի՝ երեւանամերձ հատվածի վրա»,- ասաց մեր զրուցակիցը:
«Amadee-24» տիեզերական «զորավարժության» կազմակերպիչը Ավստրիական «Տիեզերական ֆորում»-ն է, որ 2006-ից տարբեր երկրներում նման սիմուլյացիաներ է կազմակերպում:
«Փորձարկման բյուջեն այնքան մեծ չէ, որ ընդօրինակի ձգողականությունը, որը Մարսի վրա ավելի թույլ է, քան Երկրի վրա, ինչպես նաեւ՝ ճառագայթման հոսքը, որը Մարսի վրա շատ ավելի բարձր է, քանի որ այնտեղ մթնոլորտ գրեթե չկա, եւ այն ազատորեն ներթափանցում է մոլորակ: Մնացած բոլոր պայմանները հնարավորինս ճշգրտորեն կրկնօրինակվել է»,- հավելեց մեր աղբյուրը:
ՍԵՎԱԿ ՎԱՐԴՈՒՄՅԱՆ
