Քաղաքագետ Դավիթ Ստեփանյանը տեսանելի ապագայում՝ այն է մոտակա ամիսներին, հայ-ադրբեջանական նոր պատերազմի կամ մասշտաբային բախման հիմքեր չի տեսնում։
«Պատերազմի համար չկան աշխարհաքաղաքական անհրաժեշտ նախապայմաններ՝ հաշվի առնելով, որ Ադրբեջանը 2023 թվականի սեպտեմբերից հետո դեռ չի մարսել Լեռնային Ղարաբաղի բնակչության էթնիկ զտումը։ Այդ երկիրը դեռ շատ մեծ աշխատանքներ պետք է տանի, որպեսզի մարսի այդ ամենը, եթե, իհարկե, կարողանա»,- Azg.am-ի թղթակցի հետ զրույցում ասաց քաղաքագետը։
Անդրադառնալով նախօրեին Ներքին Հանդի ուղղությամբ ադրբեջանական հերթական ագրեսիային, Դավիթ Ստեփանյանը նկատեց՝ նմանօրինակ էսկալացիաներն անհնար է լիովին բացառել. դրանք կան և շարունակվելու են, որովհետև Իլհամ Ալիևի՝ 2020 թվականից ի վեր՝ Ադրբեջանի իշխանության ղեկին հայտնվելուց հետո, սպանությունները նրա ռեժիմի կողմից Հայաստանի նկատմամբ օգտագործվում են որպես մահակ։
«Փորձ է արվում ճնշում գործադրել Հայաստանի վրա՝ այս կամ այն զիջումը կորզելու նպատակով, և մենք տեսնում ենք, որ մանավանդ վերջին տարիներին այս քաղաքականությունը, կարծես թե, իրեն արդարացնում է։ Ուրեմն ինչո՞ւ պետք է Ալիևը հրաժարվի այդ մահակից։
Ներքին Հանդի ուղղությամբ նախօրեի ցավալի միջադեպը՝ հերթական սպանությունները, մեծ հաշվով այդ նույն օպերայից են։
Այդ միջադեպն օգտագործվել է Ադրբեջանի կողմից և լիովին տեղավորվում է այդ երկրի քաղաքականության տրամաբանության մեջ։ Իսկ Ադրբեջանի վարած քաղաքականության հիմքում ընկած է մեկ ցանկություն՝ Հայաստանի հետ ոչ մի դեպքում խաղաղության պայմանագիր չստորագրել, չճանաչել Հայաստանի Հանրապետության տարածքային ամբողջականությունը և Հայաստանի նկատմամբ շարունակել սողացող ագրեսիան կամ հիբրիդային պատերազմը»,- ասաց քաղաքագետը։
Ինչ վերաբերում է ՀԱՊԿ միացյալ շտաբի պետ Անդրեյ Սերդյուկովի դիտարկմանը, որ ՀԱՊԿ-ը հայ-ադրբեջանական սահմանին հակամարտության սրման մեծ հավանականություն է տեսնում, Դավիթ Ստեփանյանն ընդգծեց՝ այս քաղաքականության մեջ Ռուսաստանն Ադրբեջանի հետ է։
«Նրանք աշխատում են ձեռք ձեռքի տված, որովհետև ունեն նույն շահերը, և Ռուսաստանի հետ ասոցացվող ՀԱՊԿ-ը չի կարող բացառություն կազմել»,- ամփոփեց մեր զրուցակիցը։
Հիշեցնենք, որ ՀԱՊԿ-ը հայ-ադրբեջանական սահմանին հակամարտության սրման մեծ հավանականություն է տեսնում, հայտարարել է ՀԱՊԿ միացյալ շտաբի պետ, գեներալ-գնդապետ Անդրեյ Սերդյուկովը՝ շեշտելով՝ «իրավիճակի կարգավորման համար խաղաղության պայմանագիր է անհրաժեշտ»։
«Որոշ պետությունների կողմից Հարավային Կովկասում դիրքերն ամրապնդելու, Կասպից ծովի ավազանի ռեսուրսներից օգտվելու, դեպի Կենտրոնական Ասիա ուղիղ ելք ապահովելու փորձեր են արձանագրվում», – ասել է Սերդյուկովը՝ նշելով, թե այդ նպատակին հասնելու համար ակտիվորեն օգտագործվում է նաև հայ-ադրբեջանական սահմանի բարձր կոնֆլիկտի հավանականությունը։
