«Հանրապետություն» կուսակցության անդամ Արտակ Զեյնալյանը կտրականապես հերքում է շրջանառվող տեղեկությունները, որ ՀՀ վարչապետ Նիկոլ Փաշինյանն իրեն պարտադրել է ԱԺ արտահերթ ընտրությունների անցկացման պարագայում վարչեպետի պաշտոնում առաջադրել սեփական թեկնածությունը, սակայն մեկ պայմանով՝ Երևանի ավագանու ընտրությունների օրինակով՝ անհրաժեշտ պահին, հավաքված ձայները փոխանցել իրեն։
Հիշեցնենք, որ թեև «Քաղաքացիական պայմանագիր» կուսակցությունը 2023 թվականի սեպտեմբերի 17-ի ավագանու ընտրություններում քվեների անգամ մեկ երրորդը չէր ստացել, սակայն հոկտեմբերի 10-ին կայացած ավագանու նիստում իշխող կուսակցության թեկնածու Տիգրան Ավինյանը ձայների 32 կողմ, 5 դեմ հարաբերակցությամբ ընտրվել էր Երևանի քաղաքապետ։ Ավագանու նիստում անհրաժեշտ քվորումն այն ժամանակ իրենց 13 մանդատով ապահովել էին «Հանրապետություն» և «Հանրային ձայն» կուսակցությունները։
Քաղաքապետ ընտրվելու համար Ավինյանին պակասող 3 ձայնը լրացրել էր Արամ Սարգսյանի հիմնադրած «Հանրապետություն» կուսակցությունը, ինչից հետո էլ իշխանության հետ կոալիցիոն հուշագիր էր ստորագրվել։
«Որտեղի՞ց եք վերցրել, որ նման լուրեր են շրջանառվում։ Մի՛ հավատացեք, այդպիսի խոսակցություններ չկան, սուտ է», -Azg.am-ի թղթակցի հետ զրույցումասաց ասաց Արտակ Զեյնալյանը։
Դիտարկմանը, որ առանց կրակ ծուխ չի լինում, քաղաքական գործիչը պատասխանեց.
«Լրատվություն-լրատվության սպառող ժամանակակից հարաբերություններում լինում է. ծուխն ստեղծում են, որպեսզի կրակ առաջանա»,- ասաց Զեյնալյանը։
Ճշգրտող հարցին՝ պատրաստվում է արդյոք «Հանրապետություն» կուսակցությունը մասնակցել ԱԺ հնարավոր արտահերթ ընտրություններին, մեր զրուցակիցը պատասխանեց՝ իրենց հայտնի չէ, որ առաջիկայում Հայաստանում արտահերթ ընտրություններ են սպասվում։
Եթե, այնուամենայնիվ, առաջիկա ամիսներին արտահերթ խորհրդարանական ընտրություններ կայանան, իրենք կմասնակցե՞ն, հետաքրքրվեցինք ։
«Որպես քաղաքական ուժ՝ «Հանրապետություն» կուսակցությունը, իհարկե, բոլոր տեսակի ընտրություններին մասնակցելու է՝ անկախ նրանից՝ դրանք երբ կլինեն։ Ցանկացած քաղաքական ուժի առաքելությունն է ընտրություններին մասնակցել։ Դա վերացական պատասխանն է վերացական հարցին։ Կոնկրետ ոչինչ չկա, հետևաբար պատասխանը կոնկրետ լինել չի կարող»,- ամփոփեց «Հանրապետություն» կուսակցության անդամը։
