Ինչպես հաղորդում է «Արմենպրես»-ը, Ուկրաինայի նախագահ Վիկտոր Յանուկովիչը հայտարարել է, որ Եվրոմիությանը կամ Մաքսային միությանը երկրի անդամագրվելը կորոշվի հանրաքվեով: Այդ մասին նա ասել է ուկրաինական հեռուստաալիքներին տված հարցազրույցներում, որը հեռարձակվել է օգոստոսի 30-ին:
«Եվրոպական միությանը կամ Մաքսային միությանը Ուկրաինայի անդամակցության հարցն անպայման կորոշի ժողովուրդը հանրաքվեի միջոցով: Երբ կլինի այն, մենք չգիտենք: Բայց անպայման կլինի: Երբ Եվրոպական միություն կամ Մաքսային միություն մտնելու որոշումն ընդունվի, այդ ժամանակ ամեն դեպքում խնդիրն առանց հանրաքվեի չի լուծվի»,- հայտարարել է Յանուկովիչը:
Հարցազրույցի ընթացքում Ուկրաինայի նախագահն անդրադարձել է նաեւ գազի գնի նվազեցման շուրջը Ռուսաստանի հետ ընթացքող բանակցություններին: Նա նշել է, որ այդ կապակցությամբ Կիեւը «նվաստացուցիչ առաջարկություններ» է ստանում:
Վ. Յանուկովիչը հայտարարել է, որ Ուկրաինան 20 մլրդ դոլար է կորցրել Ռուսաստանի հետ կնքած գազի պարտավորագրից:
