Հայաստանում հավատարմագրված մի շարք երկրների դեսպաններն արձանագրում են, որ հավաքական Արեւմուտքն ընտրողաբար է վերաբերվում Մերձավոր Արեւելքի խնդիրներին: «Հավաքական Արեւմուտքի երկակի ստանդարտները Մերձավոր Արեւելքում» կլոր սեղանի ժամանակ Բելառուսի, Իրանի, Սիրիայի եւ այլ երկրների դեսպաներն ընդգծեցին՝ չդադարող պատերազմներին, մարդու իրավունքների եւ ժողովրդավարության սկզբունքների ակնհայտ խախտումներին Եվրոպական մի շարք երկրներ եւ Ամերիկան անդրադառնում են «ըստ ճաշակի»: Միացյալ Նահանգներն ու եվրոպական որոշ երկրներ մի դեպքում ագրեսորին չեն ներում, պատժամիջոցներ են սահմանում, մյուս դեպքում՝ կամք չեն ցուցաբերում անգամ թղթի վրա արձանագրել ակներեւ բռնությունը:
Հայաստանում Սիրիայի դեսպան Նորա Արիսյանն «Ազգ»-ի հետ զրույցում ասաց. «12 տարի շարունակ պատերազմի մեջ է գտնվում Սիրիան, եւ այդտեղ մարդիկ առավել քան լավ են հասկանում, թե ինչ ասել է «երկակի ստանդարտ»: Դա է նաեւ պատճառը, որ պաշտոնական Դամասկոսը մերժում է միջազգային (արեւմտյան ու ամրիկյան) որոշ կազմակերպությունների ներկայությունը իր հողում: Արեւմուտքի երկակի ստանդարտներն առավել ցցուն արտահայտվեցին այս տարվա փետրվարին՝ Սիրայում տեղի ունեցած երկրաշարժի ժամանակ: Եվրոպական այն երկրները, որ նույն առիթով օժանդակություն էին ուղարկում Թուրքիա, անտեսեցին Սիրայում տեղի ունեցած արհավիրքը»:
Բելառուսի դեսպան Ալեքսանդր Կոնյուկն էլ մեզ հետ զրույցում ընդգծեց հավաքական Արեւմուտքի կողմից ներքին կոնֆլիկտներ հրահելու եւ գունավոր հեղափոխություններ կազմակերպելու փաստը. «Արեւմուտքը նման մի հեղափոխություն Բելառուսում էր ցանկանում իրականացնել՝ 2020-ին՝ նախագահական ընտրությունների ժամանակ: Արեւմուտքի ընդունած պատժամիջոցների փաթեթը, էկոնոմիկայի ոլորտի ու ֆիզիկական-իրավաբանական անձանց նկատմամբ, ստիպեց փոխել Բելառուսի սահամանդրական կարգն ու վերանայել մեր հարաբերությունները որոշ գործընկեր պետությունների հետ», ասաց նա:
ՍԵՎԱԿ ՎԱՐԴՈՒՄՅԱՆ
