Արցախը, անգամ հայաթափվելուց հետո, դառնում է հանուն իշխանության պայքարի հիմնական պատրվակ. քաղաքագետ

Վստահ եմ, որ ՀՀ գործող իշխանությունները չեն ընդունի ԱԺ պետաիրավական հարցերի մշտական հանձնաժողովում այսօր քննարկվող «Հայաքվե» քաղաքացիական նախաձեռնության ներկայացրած օրենքի նախագիծը. դա առավել քան հասկանալի է։ Ավելին, վստահ եմ, որ այս նախաձեռնության հեղինակների հիմնական նպատակն այն չէ, որ խորհրդարանն այդ օրինագիծն ընդունի, և օրենքն ուժի մեջ մտնի։ Azg.am-ի թղթակցի հետ զրույցում նման տեսակետ հայտնեց քաղաքագետ Արմեն Բաղդասարյանը։

«Կարծում եմ՝ նախագիծը նախաձեռնողները դա ավելի շատ արել են քաղաքական նպատակներով, որպեսզի իշխանությունները մերժեն այն, և հասարակության համար էլ ավելի ակնհայտ դառնա, որ ՀՀ իշխանությունները դավաճանում են ազգային-պետական շահերը, հետևաբար պետք է օր առաջ ազատվել նրանցից։

Ես չեմ կարծում, որ «Հայաքվե»-ի այս նախագիծն ուղղակիորեն կապված է Արցախի ապագայի հետ. սա ներքաղաքական պայքարի հերթական դրվագն է, և ինչպես միշտ՝ Արցախը, անգամ հայաթափվելուց հետո, դառնում է ներքաղաքական պայքարի, հանուն իշխանության պայքարի հիմնական պատրվակ. ընդամենը պատրվակ, որովհետև իրականում քաղաքական ուժերը շատ ավելի պրագմատիկ նպատակներ են հետապնդում՝ ավելի կոնկրետ իշխանության հասնելու նպատակներ»,- ասաց քաղաքագետը։

Արմեն Բաղդասարյանը հավելեց՝ ՀՀ իշխանությունները հրաշալի հասկանում են սա, սակայն դրանից որևէ կերպ խուսափել չեն կարող։

«Դրա համար էլ ոչ այնքան բովանդակային քննարկում են իրականացնում։ ԱԺ պետաիրավական հանձնաժողովի նիստում բովանդակային շատ քիչ բան կա. իշխանություններն ավելի շատ զբաղվում են նրանով, ինչով սովոր են զբաղվել և ինչն իրենց մոտ լավ է ստացվում. նրանք փորձում են իրենցից բացի՝ մեղքը բարդել բոլորի վրա։

Կոնկրետ այս հանձնաժողովում իշխանությունները հերթական անգամ փորձեցին ցույց տալ, որ նախկիններն են մեղավոր՝ սկսած 1991 թվականից։ Մինչդեռ ավելի լուրջ կլիներ, եթե քննարկվեր շատ ավելի առարկայական հարց, թե արդյոք այդ նախագծի ընդունումն օգնելո՞ւ է հետագայում արցախյան խնդիրն ինչ-որ կերպ՝ թեկուզ մասնակիորեն կարգավորելուն, թե վնասելու է։

Այսինքն՝ քննարկումները պետք է միտված լինեին ապագային, բայց մենք, ցավոք, տեսանք որ դրանք ավելի շատ անցյալի քննարկումներ են՝ անցյալի համար միմյանց մեղադրելու շուրջ բանավեճ»,- ամփոփեց մեր զրուցակիցը։

Հիշեցնենք, որ ԱԺ պետաիրավական հարցերի հանձնաժողովի նիստին զուգահեռ՝ «ՀայաՔվե» նախաձեռնության անդամները խորհրդարանի առջև բողոքի ակցիա են իրականացնում։

Հիշեցնենք նաև, որ «Հայաքվե» նախաձեռնությունը առաջարկել է  Հայաստանի ՔՕ օրենսգրքում լրացումների նախագիծ, ըստ որի քրեորեն պատժելի  արարքներ են որակվում Հայոց ցեղասպանության միջազգային ճանաչումից հրաժարվելը կամ դրա վտանգավորությունը նսեմացնելը ու ՀՀ անունից Արցախն այլ պետության կազմում ճանաչելը։