Դուք ինքներդ եք 2021 թվականի նախընտրական ծրագրում այս մոտեցումներն ու հայտարարությունները դրել, հիմա ասում ենք՝ տեր կանգնեք ձեր խոստումներին. ԱԺ պետաիրավական հարցերի հանձնաժողովի նիստին, դիմելով իշխանական պատգամավորներին, ասաց «Հայաստան» խմբակցության պատգամավոր Արծվիկ Մինասյանը։
«Քաղաքացիներն իրավունք են ստացել անմիջական օրենսդրական նախաձեռնություն իրականացնել, ուզում եք դա փոխարինել մեկ պատգամավորո՞վ։ Ասում եք՝ ինչու դուք չեք ներկայացրել օրինագիծ։ Ամեն մեկն իր իրավունքն է իրականացնում։ ժողովրդի կողմից իրականացված նախաձեռնությունը միակ մեխանիզմն է՝ օրենքի նախագիծը տանել հանրաքվեի՝ անկախ իշխանական մեծամասնության դիրքորոշումից։ Մենք պետք է կարևորենք դա։ Համաձայնեք քվերակել, հետո միասին նստենք, աշխատենք»,- հորդորեց Արծվիկ Մինասյանը իշխանական պատգամավորներին։
Իշխանության գլուխ կանգնած քաղաքական ուժը կա՛մ պետք է փոխի իր նախընտրական ծրագրերում առկա դրույթները, կա՛մ պետք է հրաժարական տա. ավելացրեց ընդդիմադիր պատգամավորը՝ ներկայացնելով «Հայաքվե» քաղաքացիական օրենսդրական նախաձեռնության առաջադրած օրակարգային հարցի մասին խմբակցության հայտարարության նախագիծը։
«Եթե մեծամասնություն կազմող ՔՊ-ն իր որոշմամբ է մեծ հաշվով հնարավորություն տալու այս հայտարարությունը ընդունել կամ մերժել՝ կամ պետք է առաջարկի նախընտրական ծրագրի և կառավարության ծրագրով ամրագրված և ստանձնած պարտավորության այլ ճանապարհային քարտեզ, եթե դա էլ չի անում, բնականաբար, վերջին լուծումը մնում է հրաժարական և հեռացում»,-հայտարարեց Մինասյանը։
Առաջին անգամ է, որ 58 հազար քաղաքացու ստորագրությամբ հանրությունն օրենսդրական նախաձեռնություն է ներկայացրել, ինչն ամարագրված է հայտարարության մեջ։
«Սա կարևոր գործիք է այն քաղաքական ուժերի հանդեպ վերահսկողություն իրականացնելու, որոնք նախընտրական ծրագրերում և իրենց հայտարարություններում ամրագրել են նորմեր, որոնք անհրաժեշտ է նաև քաղաքացիների կողմից ընթացիկ վերահսկողություն իրականացնելու առումով»,-հայտարարեց «Հայաստան» խմբակցության քարտուղարը։
