Նախորդ շաբաթ, վկայաբերելով Թուրքիայի նախագահ Ռեջեփ Թայիփ Էրդողանի խոսքերը, տեղեկացրել էինք, որ նոյեմբերի 28-ին Թուրքիան սպասում է ԻԻՀ նախագահ Էբրահիմ Ռայիսիի այցին: Սակայն, հակառակ թուրքական կողմի հավաստիացումների, Իրանի նախագահի այցը Թուրքիա տեղի չունեցավ:
Նոյեմբերի 29-ին Թուրքիայի նախագահական գրասենյակից ֆրանսիական լրատվական գործակալությանը տեղեկացրեցին, որ Էրդողանը նոյեմբերի 28-ին որեւէ հանդիպում չի նախատեսել: Սակայն Թուրքիայի նախագահի գրասենյակը Էբրահիմ Ռայիսիի այցելության չեղարկման կամ հետաձգման մասին Agence France-Presse-ին ոչինչ չի հայտնել:
Ուշագրավն այն է, որ նախագահ Ռայիսիի այցի մասին անձամբ Էրդողանն էր տեղեկատվություն փոխանցել լրագրողներին, որին հաջորդել էր նաեւ իրանցի բարձրաստիճան պաշտոնյայի՝ Անկարա նախատեսված այցելության վերաբերյալ թուրքական մամուլի հրապարակումները: Իսկ իրանական աղբյուրների հրապարակած տեղեկատվությունն այդ այցելության մասին խիստ սահմանափակ ու կցկտուր էր:
Նախագահ Ռայիսիի այցի չեղարկման լուրն Իրանում պաշտոնապես առաջինը հայտնեց ԻԻՀ ԱԳ նախարար Ամիր-Աբդոլլահիանը՝ կառավարության նիստի ավարտից հետո: Ըստ նախարարի, այցի հետաձգման պատճառը Գազայի հատվածում մարդասիրական հրադադարի ժամկետի երկարաձգման շուրջ քննարկումների նպատակով նոյեմբերի 29-ին նախատեսված ՄԱԿ-ի Անվտանգության Խորհրդի նիստին մասնակցելու հրավերն էր, որին ինքը չի կարողացել մասնակցել՝ արտոնագիրը (վիզա) ուշացումով ստանալու պատճառով:
ԻԻՀ ԱԳ նախարարը նաեւ լրագրողներին տեղեկացրեց, որ հաշվի առնելով Գազայի հարցին նվիրված քննարկումների առաջնահերթությունը, Իրանի ու Թուրքիայի նախագահների միջեւ պայմանավորվածություն է ձեռք բերվել այցը մի քանի օրով հետաձգելու մասին:
Հայտնի է, որ Էրդողանը Գազայի շուրջ ծավալվող իրադարձությունների ընթացքում ներկայացել է որպես Իսրայելի քաղաքականության ջերմեռանդ քննադատող, իսկ Իրանի հովանավորությունը վայելող ՀԱՄԱՍ կազմակերպության անդամներին անվանել ազատագրական պայքարի մարտիկներ: Դրանով հանդերձ, քաղաքական մեկնաբանների կարծիքով, Թեհրանն Անկարայից պահանջում է չբավարարվել միայն բանավոր քննադատություններով եւ Իսրայելի հետ խզել առեւտրատնտեսական հարաբերությունները, հատկապես՝ էներգետիկայի ոլորտում:
Նշենք, որ ԻԻՀ նախագահ Ռայիսիի Թուրքիա այցելության ժամկետների խախտման դեպքերը եզակի չեն:
ԳՐԻԳՈՐ ԱՌԱՔԵԼՅԱՆ
Իրանում ՀՀ նախկին դեսպան
