Արեւմուտքն անմիջապես մեղադրեց Ասադին
Դամասկոսի արվարձան Գուտայում օգոստոսի 21-ի քիմիական գրոհի վայր այցելած ՄԱԿ-ի փորձագետները հայթայթել են ապացույցներ, որ խաղաղ բնակչության դեմ «բավական մեծ չափերով» զարին գազ է օգտագործվել: Այդ են վկայում շրջակա միջավայրի փորձաքննությունները, քիմիական տարրալուծումը եւ տուժածների բժշկական տվյալները:
Ասոշիեյթեդ պրես գործակալության հրապարակած հաղորդման մեջ չի նշվում, թե ՄԱԿ-ի փորձագետները քիմիական գրոհի համար պատասխանատու համարե՞լ են արդյոք հակամարտ կողմերից որեւէ մեկին: Անկախ դրանից, ՄԱԿ-ում ԱՄՆ-ի, Մեծ Բրիտանիայի եւ Ֆրանսիայի մշտական ներկայացուցիչները անմիջապես սկսել են մեղադրել նախագահ Բաշար Ասադին: Ավելի ուշ նույն կերպ են վարվել պետդեպարտամենտում եւ Սպիտակ տանը, թեեւ վկայակոչվող ապացույցները խիստ հակասական են: Փորձագետների զեկուցագրի լուսանկարներից մեկի վրա երեւում են ռուսերեն տառերով հրթիռներ: Ամենայն հավանականությամբ, դրանք խորհրդային M-14 ռեակտիվ արկի բեկորներ են: Դա հնացածՙ 1950-ականների զենք է: Սիրիական բանակը դրանից վաղուց է հրաժարվել: Տեսուչները չեն բացառում նաեւ այն, որ արկերի մարտագլխիկները կարող էին լինել ինքնաշեն: ՄԱԿ-ում ՌԴ մշտական ներկայացուցիչ Վիտալի Չուրկինը կոչ է անում հապճեպ հետեւություններ չանել եւ չանտեսել Սիրիայից ստացվող նոր տեղեկությունները:
ՄԱԿ-ի ԱԽ-ում փակուղային իրավիճակ կարող է ստեղծել կոշտ ձեւակերպումներով բանաձեւի նախագիծը, որի օգտին նախօրեին Փարիզում հանդես եկան Ֆրանսիայի նախագահ Ֆրանսուա Օլանդը, Մեծ Բրիտանիայի արտգործնախարար Ուիլյամ Հեյգը եւ ԱՆ պետքարտուղար Ջոն Քերրին:
CNN հեռուստաալիքը նշում է, որ Բաշար Ասադին հախուռն կերպով մեղադրող Արեւմուտքի ղեկավարների հայտարարությունները համապատասխանում են սիրիական ընդդիմության շահերին, որը ՄԱԿ-ի փորձագետների զեկուցագրի հրապարակումից հետո միջազգային ընկերակցությանը կոչ արեց «միասնական եւ վճռական պատասխան տալ» Ասադի վարչակարգին:
Երեկ երեկոյան սիրիական իշխանությունները հայտարարեցին, որ «անհերքելի ապացույցներ» են հայտնաբերել, որ քիմիական զենքը օգտագործել են ընդդիմադիրներըՙ «օտար մի երկրի» աջակցությամբ եւ այդ «ապացույցները» ներկայացրել են ՄԱԿ-ի համապատասխան կառույցին:
Սիրիայի վարչակարգի դեմ ԱՄՆ-ի նախատեսած «սահմանափակ» ռազմական հարվածը այժմ անորոշ ժամկետով հետաձգված է շնորհիվ այն բանի, որ Ասադը համաձայնել է միջազգային դիտորդների վերահսկողության ներքո ոչնչացնել Սիրիայի քիմիական զինանոցը:
