ՌԱԿ ԼԻԲԱՆԱՆԻ ՇՐՋԱՆԱՅԻՆ ՎԱՐՉՈՒԹԻՒՆ
Ռամկավար ազատական կուսակցութեան Լիբանանի շրջանային վարչութեան նախաձեռնութեամբ եւ հրաւէրով նախորդ օրը կայացաւ խորհրդակցական հանդիպում Շրջանային վարչութեան եւ Թէքէեան մշակութային միութեան հիմնադիրներու մարմնին միջեւ: Զոյգ վարչութիւնները կը ներկայացնէին ընկերներ Յակոբ Գասարճեան, Յարութիւն Երկանեան, Յովսեփ Էմիրեան, Էտի Պահատրեան, Արտեմ Նանճեան, Մայք Վայէճեան, Նար Խաչատուրեան, Արտաւազդ Մելիքսէթեան եւ դոկտ. Աւետիս Տաքսէսեան: Ժողովին մասնակից դարձան նաեւ ԹՄՄ Ամերիկայի եւ Կանադայի կենդրոնական վարչութեան անդամՙ ընկ. Յակոբ Վարդիվառեանը, Շրջանային վարչութեան վարիչ-տնօրէն ընկ. Օհան Պոտրումեանը եւ «Զարթօնքի» պատասխանատուներէն ընկ. Սարգիս Սեֆերեանը:
Արծարծուեցան յատկապէս Լիբանանի շրջանակը յուզող եւ առհասարակ կուսակցութեան վերաբերող հարցեր: Հասկացողութեան մթնոլորտի մէջ գումարուած նման հանդիպումները որոշուեցաւ դարձնել յաճախակի:
