Կարծում եմ՝ այս ամենը պետք է կատարվի, բայց զուտ որպես երկրորդական կարևորության միջոցառում, որն ուղղակի անխուսափելի է։ Azg.am-ի թղթակցի հետ զրույցում այս մասին ասաց իրավապաշտպան Ռուբեն Մելիքյանը՝ անդրադառնալով Ադրբեջանի դեմ ՄԻԵԴ նոր հայց ներկայացնելու թեմային։
Հիշեցնենք, որ ՄԻԵԴ-ում Հայաստանի կողմից Ադրբեջանի դեմ ներկայացված միջպետական գանգատը կլրացվի՝ ներառելով արցախցիների՝ գույքի նկատմամբ իրավունքի վերականգնման հարցը։ Այլ կերպ ասած՝ ներկայացված գանգատը լրացվելու է, այսինքն՝ հիմնական գործին ավելացվելու է նոր հայց։ Հայցը ներկայացվելու է առաջիկայում։
Նրա խոսքով՝ Հայաստանի կողմից նմանօրիանկ հայցի ներկայացումը նույնքան բնականոն երևույթ է, որքան, պայմանական ասած, փողոցն անցնելիս աջ և ձախ նայելը։
«Այսինքն՝ սա բնական գործողություն է, որ կատարվում է, սակայն իրականում այս պրոցեսը ներկայացվում է որպես չտեսնված մի երևույթ։ Իրականում սա իրենից հույսի վաճառականություն է ներկայացնում։
Իշխող քաղաքական ուժն այսօրինակ միջոցառումներով ցանկանում է ցույց տալ, որ ինքն ինչ-որ բան է անում, կոնկրետ արդյունքի միտված գործողություններ է կատարում, այնինչ բոլորս էլ լավ գիտենք, որ միջազգային համակարգը կորցրել է իր արդյոունավետությունը, նպատակային չէ»,- ասաց Ռուբեն Մելիքյանը։
Վերջում իրավապաշտպանը հավելեց, որ անձամբ ինքը վերոնշյալ գործընթացից որևէ արդյունք չի ակնկալում։
Ավելի վաղ միջազգային իրավունքի մասնագետ Սիրանուշ Սահակյանը Sputnik Արմենիայի-ի հետ զրույցում հավաստիացրել էր, որ եթե անձի հաշվառման հասցեն փոխվի, Արցախում թողած գույքի նկատմամբ իրավունքը չի վտանգվի։
«Այդ մտավախությունները տեղին չեն, քանի որ սեփականության իրավունքի պաշտպանությունը կապված չէ բնակության կամ քաղաքացիության իրավունքների հետ. քանի դեռ արցախցիները պահպանում են սեփականության իրավունքի իրենց վկայականները, նրանք շարունակում են օգտվել իրենց նախկին իրավունքներից», – ընդգծել էր Սահակյանը։
Նրա խոսքով` եթե անգամ Ադրբեջանը, ոչ օրինական հիմքերով ակտեր ընդունելով, այդ սեփականությունը փոխանցի 3–րդ անձանց, միևնույնն է` արցախցիների սեփականության իրավունքը պաշտպանված է։ Սահակյանը վստահեցրել է` արցախցիներն այդ գույքը տիրապետելու, դրան հասանելիություն ունենալու, տնօրինելու լիարժեք իրավասություններ ունեն։
