Թէքէեան Մշակութային Միութեան «Մհեր Մկրտչեան» թատերախումբի հիմնադրութեան 25-րդ տարեդարձին առթիւ թատերական վարչութիւնը բարձրորակ ներկայացում մը հրամցուց նիւեորքահայ հասարակութեան: Արդարեւ, Նոյեմբեր 4-ին թատերախումբը ներկայացաւ Ուիլիըմ Շէյքսփիրի հանրայայտ «Բազում աղմուկ վասն ոչինչի» թատերախաղով, Պրոտուէյի (Նիւ Եորք) Symphony Space թատերասրահին մէջ: Բեմադրութեան համար Երեւանէն հրաւիրուած էր տաղանդաւոր եւ քաջածանօթ բեմադրիչ Ժիրայր Բաբազեանը:
Մօտ երեք ամիս հիւր բեմադրիչը յանապազօրեայ փորձերով Նիւ Ճըրզիի ԹՄՄ-ի կեդրոնին մէջ, 25 դերակատարներով պատրաստեց Շէյքսփիրի նշեալ թատերախաղը: Երջանկութիւնը այն եղաւ, որ փորձառու դերասաններուն կողքին բեմ ելան ամերիկածին երիտասարդ հայ տղաք ու աղջիկներ, որոնք յանգաւոր քերթուածներու երաժշտախառն տողերը կրցան յաջողութեամբ ներկայացնել թատերասէր ունկնդիրներուն: Գործը հայերէնի թարգմանուած է ատենին՝ Պէյրութի մեր մտաւորականներէն Վարուժան Պետիկեանը: Այդ գործը առաջին անգամ բեմ բարձրացած է Պէյրութի ՀԵԸի «Վահրամ Փափազեան» թատերախումբին կողմէ, բեմադրութեամբ Գրիգոր Սաթամեանի:
Գլխաւոր դերերով բեմ բարձրացան Յարութ Չաթմաճեանը (Տոն Փետրօ), Յարութ Պարսումեանը (Պենետիք), Դալար Զօքեան-Թոմլինսընը (Պէաթրիս), Արմենակ Քրուշեանը (Գլոտիօ), Ռոյ Պահեանը (Լէոնարտօ), Թալին Պահեանը (Հիրօ), Թալին Գարակիւլեանը (Տոկպերի): Յիշենք նաեւ այս ներկայացման թեքնիք աշխատակիցները. բեմավար` Հրաչ Զօքեան, զգեստներ` Մարի Զօքեան եւ Վանիկ Ժանեան, բեմայարդար` Պօղոս Օրանճեան, լուսաւորում` Հայկ Կիւլեան, երաժշտութիւն` Յարութ Պարսումեան, թատերախաղի անգլերէնի թարգմանութիւն` Անի Չաթմաճեան, թարգմանութեան լուսարձակում` Էլիզապէթ Աքեան:
Ասիկա թատերախումբին 24-րդ բեմադրութիւնն էր, զոր նախորդեր էին մի քանի տասնեակ թատերախաղերով, բեմ բարձրացած զանազան ճաշակի բեմադրիչներով` Թամար Յովհաննէսեան, Պերճ Ֆազլեան, Գրիգոր Սաթամեան, Վարդան Գառնիկի, Ժիրայր Բաբազեան, Յարութ Չաթմաճեան եւ Գագիկ Կարապետեան: Թատերախումբը ունեցած է տարբեր քաղաքներու մէջ հիւրախաղեր, որոնց մէջ Պերճ Զէյթունցեանի «Ոտքի, Դատարանն է …» թատերախաղը՝ 10 անգամ: Մկրտչեանականներ բեմ բարձրացած են նաեւ Երեւանի եւ Գիւմրիի մէջ՝ արժանանալով հայրենի խստապահանջ հանդիսատեսի եւ քննադատներու բարձր գնահատանքին:
Այս բազմածախս թատերական ներկայացման համար իրենց լիաբուռն նիւթական աջակցութիւնը բերին թատերախումբին երկարամեայ բարերարը` Քիւրտեան ընտանիքը, ինչպէս նաեւ` թատերախումբի բարեկամներ Էտուըրտ եւ Գարմէն Կիւլպէնկեանները, Հենրի Տինիճեանը, Տիկին Շողակ Յովհաննէսեանը եւ ուրիշ ազգայիններ:
Հակառակ տիրող քաղաքական անստոյգ պայմաններուն, Արցախեան ողբերգութեան, պաղեստինեան խնդրի արիւնալի զարգացումին, դարձեալ մեծ թիւով թատերասէրներ ներկայ էին ներկայացման: Անոնք, ինչպէս մի՛շտ, եկած էին քաջալերելու հայ թատրոնը եւ հայերէն լեզուով ներկայացուած մշակութային ձեռնարկը: Խրախուսիչ էր նաեւ ներկաներուն մէջ տեսնել շրջանի մեր հոգեւորականները, ծանօթ մտաւորականներ եւ ազգային դէմքեր:
Շուտով կը ծրագրուի նոյն ներկայացումը բեմ հանել Նիւ Ճըրզիի եւ հայաշատ այլ քաղաքներու մէջ:
Վարձքը կատա՛ր բեմադրիչ Ժիրայր Բաբազեանին, ԹՄՄ-ի թատերական յանձնախումբի ժրաջան անդամներուն եւ անշուշտ՝ բեմ բարձրացած ու բեմին ետին աշխատող բոլոր մկրտչեանականներուն:
Յաջորդ օր երեկոյեան թատերախումբին անդամները հիւրամեծարուեցան Նիւ Եորքի «Գորնեթաս» հայկական ճաշարանը, որուն ներկայ էին Տէր եւ Տիկին Կիւլպէնկեանները եւ տաղանդաւոր դերասանուհի Նորա Արմանին: Թատերախումբի վարչութեան ատենապետը՝ Յարութ Չաթմաճեան, գնահատանքով վեր առաւ իւրաքանչիւրին բազմակողմանի տաղանդն ու մասնակցութիւնը այս ներկայացման մէջ: Խօսք առին նաեւ բեմադրիչ Ժիրայր Բաբազեանը եւ թատերախումբի հիմնադիր ատենապետ Յակոբ Վարդիվառեանը: Ընտանեկան զուարթ մթնոլորտով ներկաները խոստացան շարունակել իրենց առաքելութիւնը վասն հայ թատրոնի յարատեւման:
Յ.Վ.
