Քիմիական զենքի ոչնչացման մասնագետների միջազգային խումբը հոկտեմբերի 1-ին ժամանել է Սիրիա: 20 հոգանոց խումբը կգույքագրի զանգվածային բնաջնջման զենքի պաշարները, որը պետք է ոչնչացվի ՄԱԿ-ի ԱԽ բանաձեւի հիման վրա, հաղորդում է Ֆրանսպրեսը:
Քիմիական զենքի արգելման կազմակերպության (ՔԶԱԿ) փորձագետները Սիրիայի տարածք են մտել Լիբանանից եւ Դամասկոսում հանդիպել Սիրիայի ԱԳՆ ներկայացուցիչների հետ: ՌԴ ԱԳՆ ներկայացուցչին վկայակոչելովՙ ՌԻԱ գործակալությունը հաղորդում է, որ մասնագետների խմբում աշխատելու է մեկ ռուսաստանցի:
Սիրիայի արտգործնախարար Ուալիդ Մուալլեմը BBC-ի թղթակցին պատմել է փորձագետներին սպասող աշխատանքի բարդությունների մասին: Նրա խոսքերով, քիմիական զենքի 19 պահեստներից (Ասոշիեյթեդ պրեսի տվյալներով, Սիրիայում կա 45 պահեստ) 7-ը գտնվում են ռազմական գործողությունների գոտում: Միջազգային տեսուչները դրանց հասնելու համար ստիպված կլինեն հակամարտ կողմերի հետ պայմանավորվել ժամանակավոր հրադադարի շուրջը:
