Վ. Պ.
Հայաստանի ԱԳ նախարար Էդվարդ Նալբանդյանը երեկ Բրյուսելում հանդիպել է Եվրոպական միության արտաքին քաղաքականության հարցերով բարձր ներկայացուցիչ Քեթրին Էշթոնի հետ:
Մամուլի հաղորդագրության համաձայնՙ ողջունելով Հայաստանի արտգործնախարարինՙ ԵՄ բարձր ներկայացուցիչը նշել է, որ այս հանդիպումը լավ առիթ է մտքեր փոխանակելու Հայաստանի եւ Եվրոպական միության հարաբերությունների հետագա զարգացման նպատակով ձեռնարկվելիք համատեղ քայլերի շուրջը:
Նախարար Նալբանդյանն ընդգծել է, որ Հայաստանը ցանկանում է հնարավոր բոլոր ուղղություններով առաջ տանել համագործակցությունը Եվրոպական միության հետՙ հիմնվելով այն համատեղ ձեռքբերումների եւ առաջընթացի վրա, որոնք վերջին տարիներին գրանցվել են Հայաստան-Եվրոմիություն հարաբերություններում:
Էդվարդ Նալբանդյանը նաեւ նշել է, թե ԵՄ-ի հետ իր հարաբերությունները կառուցելիս, նաեւ Արեւելյան գործընկերության նախաձեռնության շրջանակներում, Հայաստանը ձգտում է ունենալ սերտ, խոր եւ ընդլայնված համագործակցություն` նկատի ունենալով, միաժամանակ, Հայաստանի շահերից բխող մասնակցությունն այլ ինտեգրացիոն գործընթացներին:
«Հայաստանը, ԵՄ աջակցությամբ, անցել է բարեփոխումների կարեւոր ճանապարհ: Մենք հաստատակամ ենք շարունակելու բարեփոխումների գործընթացըՙ ուղղված ժողովրդավարության, մարդու իրավունքների եւ օրենքի գերակայության ամրապնդմանը, արդյունավետ կառավարմանը, դատաիրավական համակարգի կատարելագործմանը, կոռուպցիայի դեմ պայքարին: Այս գործընթացում մենք ակնկալում ենք ԵՄ շարունակական աջակցությունը», հանդիպմանը շեշտել է նախարար Նալբանդյանը: Նա կարեւորել է ԵՄ-Հայաստան համագործակցությունը շարժունակության բնագավառումՙ ընդգծելով, որ արդեն երկու տարի է, ինչ ստորագրվել է Եվրոպական միության հետ «Շարժունակության շուրջ գործընկերություն» հռչակագիրը, իսկ անցյալ դեկտեմբերինՙ մուտքի արտոնագրային ռեժիմի դյուրացման համաձայնագիրը:
Էդվարդ Նալբանդյանի խոսքերով` լուրջ ներուժ կա ոլորտային համագործակցության բնագավառում, որը ներառում է տասնյակ ուղղություններ: Հայաստանի արտգործնախարարի խոսքերովՙ անցյալ դեկտեմբերին ստորագրված Հայաստանի եւ Եվրոպական միության միջեւ Շրջանակային համաձայնագրի արձանագրությամբ Հայաստանին հնարավորություն է ընձեռվում մասնակցություն ունենալու ԵՄ տարբեր ծրագրերում:
Քեթրին Էշթոնը հավաստել է, որ Եվրոպական միությունը ցանկանում է շարունակել համակողմանի փոխգործակցության զարգացումը Հայաստանի հետ բոլոր ուղղություններով, որոնք համատեղելի կլինեն Մաքսային միությանն անդամակցելու Հայաստանի որոշման հետ:
Հանդիպմանն անդրադարձել են Արեւելյան գործընկերության Վիլնյուսի գագաթաժողովի նախապատրաստական աշխատանքներին: