Հայաստանի պետական ճարտարագիտական համալսարանի (Պոլիտեխնիկ) դասախոսները բուհի ռեկտոր Արա Ավետիսյանի պարզաբանումներից գոհ չեն: Հանդիպումից հետո եկել են եզրակացության, որ բուհը ֆինանսական կոլապսի առաջ է կանգնած, ինչը ռեկտորը փորձում է լուծել դասախոսապրոֆեսորական կազմի հաշվինՙ նրանց աշխատավարձերը կրճատելով եւ աշխատանքային ծավալը մեծացնելով:
Համալսարանի ֆիզիկայի ամբիոնի վարիչ, պրոֆեսոր Աշոտ Խաչատրյանի խոսքերովՙ ռեկտորը կատարվածը ներկայացնում է բարեփոխումների շղարշի ներքո: «Քննարկումներից հասկացանք, որ անհրաժեշտ է գումարել բուհի կառավարման խորհրդի նիստ: Ամենայն հավանականությամբ, համալսարանում նոր ստորագրահավաք կսկսենքՙ կառավարման համակարգի խորհրդի նիստ անցկացնելու համար:
Նամակը կուղարկենք ԿԳ նախարար Արմեն Աշոտանին եւ, ամենայն հավանականությամբ, նամակում կխնդրենք դիտարկել Արա Ավետիսյանի պաշտոնում մնալու նպատակահարմարությունը»:
Դասախոսների հավաստիացմամբՙ անձնավորված խնդիր չկա, սա հատուկ Արա Ավետիսյանի անձի դեմ ուղղված ակցիա չէ, պարզապես համալսարանը քայքայման շեմին է: «Թե որքան կտեւի նման քաղաքականությունը, չեմ կարող ասել, սակայն մի բան է հստակՙ երկու օր առաջ տեղի ունեցած նիստի ժամանակ բոլոր ելույթներ ունեցողները լիարժեքորեն բացասական էին արտահայտվում ռեկտորի կողմից տարվող քաղաքականության դեմ», ասաց Խաչատրյանը:
Ռեկտոր Արա Ավետիսյանը կատարվածի վերաբերյալ այլ մեկնաբանություն ունի. համալսարանում ով որքան աշխատի, այնքան էլ աշխատավարձ կստանա: Այն, ինչ վերջին 2 տարվա ընթացքում կատարվում է համալսարանում, ըստ ռեկտորի, կոչվում է աշխատանքի արդյունավետ կազմակերպում:
«Պակաս միջոցների պարագայում, արդյունավետ կազմակերպման հարցը դարձել է ամենօրյա խնդիր: Բուհը պետք է իր առաքելությունն իրականացնի, պետք է կարողանա լրջորեն հաշվել ամեն մի դրամի նպատակային, արդյունավետ ծախսը: Բուհում վերջին տարիներին ֆինանսական մուտքերը նվազել են: Դա կապված է ընդունվածների թվի, հասարակության սոցիալ-տնտեսական վատ վիճակի, տեխնիկական եւ բնագիտական մասնագիտությունների ցածր պահանջարկի հետ», ասաց ռեկտորըՙ հավելելով, որ հենց այս խնդիրներից ելնելով պետք է կարողանան եկամուտները ճիշտ բաշխել ու պրոֆեսորադասախոսական աշխատակազմի վճարումը կազմակերպել: «Վարձատրության նոր համակարգին անցնելու հետ կապված անհամաձայնություն առաջացավ: Որոշ մասը ասում էՙ լավ է, որ անցնում ենք ըստ աշխատանքի ճշգրիտ վարձատրման ձեւին, սակայն համաձայն չենք, որ մեր աշխատավարձը կրճատվի», ասաց Ավետիսյանըՙ հավելելով, որ համալսարանի յուրաքանչյուր տարվա ուսումնական պլանը կազմվում է համաձայն ուսանողների թվի:
«Յուրաքանչյուր տարին ունի պարտադիր ժամաքանակ, ինչը փոփոխելի չէ: Դասախոսները դասախոսություն են կարդում, գործնական ժամեր անում, լաբորատոր աշխատանքներ եւ ավարտական աշխատանքներ ղեկավարում: Ըստ ծրագրերիՙ յուրաքանչյուր թեմային հատկացվում են ժամեր եւ սահմանվում էՙ որքան դասախոսության դեպքում քանի ստուգարք, քննություն եւ կոնսուլտացիա են անցկացվում եւ ժամաքանակի համապատասխան սահմանվում են վճարները: Տարբեր բուհեր այս ժամերին տարբեր վճարներ են սահմանում: Մենք էլ որոշեցինք տարբերակում դնելՙ դասախոսության ժամն ավելի շատ պետք է արժենա, քան կոնսուլտացիայի ժամը, նույն սկզբունքն է նաեւ գործնականի եւ ստուգարքի դեպքում: Որոշեցինք ժամարժեքներ սահմանելՙ ըստ եղած գումարների եւ ծանրաբեռնվածության, ստացանք միջին թիվ, որը հաշվարկի սկզբնակետ է, պրոֆեսորի դասախոսությունը մի գումար է, դոցենտինըՙ մի գումար: Նախորդ տարի շատ բարձր աշխատավարձեր էինք տվել, իսկ այս տարբերակումներ մտցնելուց զգալիորեն ցածրացել են աշխատավարձերը: Լսարանային ժամերի վճարը բարձրացել է, ոչ լսարանայինըՙ ցածրացել: Իսկ կոնկրետ մարդկանց համար տարբերություններ են տվելՙ կախված իրենց պարապած ժամերից»:
Ըստ Ավետիսյանիՙ եթե լսարանային ժամերի համամասնությունը ճիշտ պահեին ամբիոններում, ապա աշխատավարձերը պետք է պակասեին 6000-10000 դրամով: Ըստ ռեկտորիՙ շեղումներն ունեն մեկ օբյեկտիվ պատճառՙ ֆինանսական մուտքերը համալսարանում պակասել են: Ռեկտորի մեկնաբանությամբՙ համալսարանում կրճատված հաստիքները նորմատիվային են: «Պետք է կրճատվեր 53 լաբորանտական, 107 պրոֆեսորադասախոսական հաստիք: Ամբիոններին ասվել էՙ սա ձեր հաստիքներն են, քանի հոգով ուզում եք դա պարապեք: Լաբորանտներից նախատեսված թվից ավելի քչերն են ազատվելՙ միայն նրանք, ովքեր մասնագիտական կրթություն չունեին»:
