Ի տարբերություն երեկվա՝ այսօր Ստեփանակերտում կրակոցներ չեն լսվել։ Բայց միևնույն է՝ ժողովուրդն ընկճված վիճակում է։ Մարդիկ ամեն ինչ՝ տուն-տեղ, ունեցվածք, թողել, եկել են Ստեփանակերտ, Azg.am-ի թղթակցի հետ զրույցում ասաց Արցախի ԿԳՄՍՆ կրոնի և փոքրամասնությունների բաժնի վարիչ, արցախյան շարժման ակտիվիստ Աշոտ Սարգսյանը։
«Զինծառայողներից ովքեր մոտիկ դիրքերում են եղել, վերադարձել են, բայց կան նաև պատանդներ, որոնք շրջափակման մեջ են, չեն կարողանում դուրս գալ։ Ռուսների հետ պայմանավորվել են, որ օգնեն, բայց դեռ նորություն չկա»,- պատմեց մեր զրուցակիցը։
Անդրադառնալով տեղեկություններին, թե Ադրբեջանի Աղդամով տարբեր պարենային ապրանքներով ու հիգիենայի պարագաներով 20 տոննայանոց երկու բեռնատար և 2 ավտոմեքենա հաց է ուղարկել Արցախ, Աշոտ Սարգսյանն ասաց՝ արցախցին երբեք թուրքի թխած հացը չի ուտի։
«Մարդիկ իրենց գյուղերից տեղահանվել, եկել են Ստեփանակերտ, որպեսզի հետո գնան Հայաստան, որովհետև ադրբեջանցիների առաջարկած պայմաններին ոչ ոք չի հանմաձայնի։ Բայց մեխանիզմ են մտածել՝ ժողովրդին մի քանի օր այստեղ պահեն, հետո, երբ սննդամթերքը վերջանա, ուզած-չուզած՝ կա՛մ մարդիկ վերադառնան իրենց տները, կա՛մ քաղցած այստեղ մնան։
Այս պահին էլ բոլորի տներում մի քանի ընտանիք է ապաստանել։ Օրինակ՝ ես Հաթերք գյուղից մոտիկ ընկեր ունեմ, 3 ընտանիք հիմա մեր տանն են։ Եղբայրս էլ պատրաստ է իր տան բանալիները տալ, ով ուզում է՝ գնա իր տանը ժամանակավոր ապրի։ Հորեղբորս աղջկա 4 սենյականոց տանը 7 ընտանիք է ապաստանել՝ հիմնականում երեխաներ։ Ցանկացած շենքի դիմաց 3-4 վառարան վառած՝ բոլորը ճաշ են պատրաստում, հաց թխում, միմյանց հյուրասիրում։
Գյուղերից եկածների մի մասն էլ ապաստանել է ռուս խաղաղապահների տեղակայման վայրում, բայց նրանց մի մասը վերադարձել է Ստեփանակերտ, մի մասը՝ Ասկերան՝ մոտիկ գյուղեր։ Գյուղեր են եղել, որտեղից մարդկանց տեղահանելն ուղղակի անհեթեթություն է եղել։ Խոսքը խորքային գյուղերի մասին է։ Հիմա այդ գյուղերի բնակիչները վերադարձել են իրենց տներ և մյուս համագյուղացիներին էլ զանգահարում, ասում են, որ նույն կերպ վարվեն»,- պատմեց Աշոտ Սարգսյանը։
Վերջում մեր զրուցակիցը շեշտեց՝ արցախցիներին միջազգային նորմերով պետք է ՄԱԿ-ի հովանու ներքո միջանկյալ կարգավիճակ տրվի՝ հետագայում հանրաքվեի կազմակերպման և անցկացման երաշխիքներով։
