Երեկ կայացան ֆուտբոլի Հայաստանի բարձրագույն խմբի առաջնության 8-րդ տուրից հետաձգված հանդիպումները: «Արարատը» թեեւ «Բանանցի» հետ մրցավեճում խաղն ավարտեց գոլազուրկ ոչ-ոքի, սակայն ավելի ամրապնդեց առաջատարի իր դիրքերը: Բանն այն է, որ արարատցիներին հետապնդող «Փյունիկի» ֆուտբոլիստները «Միկայի» հետ մրցավեճում անհաջող խաղացինՙ կրելով 0-3 հաշվով պարտություն: «Միկայից» գոլերի հեղինակներ դարձան Արեգ Ազատյանը, Արման Հակոբյանն ու Ալիկ Առաքելյանը: «Միկան» ընդհատեց առանց հաղթանակների 5 խաղերի շարքը:
Անհաջող ելույթներն է շարունակում երկրի չեմպիոն «Շիրակը», որը կրեց 2-րդ անընդմեջ պարտությունը: Այս անգամ գյումրեցիները Կապանում 0-2 հաշվով զիջեցին «Գանձասարին»: Հաշիվն առաջին խաղակեսում բացեց Շոթա Ջիքիան, իսկ ընդմիջումից հետո 2-րդ գոլի հեղինակ դարձավ Նարեկ Բեգլարյանը: Բարձրագույն խմբի նորեկ «Ալաշկերտն» էլ հերթական պարտությունը կրեցՙ սեփական հակի տակ 1-2 հաշվով զիջելով «Ուլիսին»: Առաջինը հաջողության հասան հյուրերը, որոնցից աչքի ընկավ Ջորջ Օդիամբոն: Հետագայում Միհրան Մանասյանին հաջողվեց հավասարեցնել հաշիվը, սակայն խաղավարտից 2 րոպե առաջ Պատոն տուգանային հարվածով հաղթանակ պարգեւեց «Ուլիսին»: Այս խաղում էլ «Ալաշկերտի» գլխավոր մարզչի պարտականությունները կատարում էր ակումբի սեփականատեր Բագրատ Նավոյանը: Այսօր նա թիմի ֆուտբոլիստներին կներկայացնի նոր գլխավոր մարզչին: «Ալաշկերտի» ղեկը վստահվելու է Արմեն Գյուլբուդաղյանցին:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 10 | 6 | 3 | 1 | 14-4 | 21 |
| 2. Գանձասար | 10 | 4 | 4 | 2 | 23-14 | 16 |
| 3. Փյունիկ | 10 | 4 | 4 | 2 | 21-15 | 16 |
| 4. Միկա | 10 | 3 | 6 | 1 | 12-8 | 15 |
| 5. Շիրակ | 10 | 3 | 3 | 4 | 16-15 | 12 |
| 6. Բանանց | 10 | 2 | 6 | 2 | 8-8 | 12 |
| 7. Ուլիս | 10 | 2 | 3 | 5 | 9-15 | 9 |
| 8. Ալաշկերտ | 10 | 0 | 3 | 7 | 11-35 | 3 |
Ռմբարկուները
| Արտակ Դաշյան | «Գանձասար» | 7 |
| Նարեկ Բեգլարյան | «Գանձասար» | 6 |
| Սերժ Դեբլե | «Շիրակ» | 6 |
| Գեւորգ Նռանյան | «Արարատ» | 5 |
| Ալեքսանդր Ռակիչ | «Արարատ» | 5 |
| Անդրանիկ Բարիկյան | «Շիրակ» | 5 |
| Սարգիս Բալոյան | «Փյունիկ» | 5 |
| Միհրան Մանասյան | «Ալաշկերտ» | 5 |
