Ժնեւում անցկացված Sotheby՛s-ի աճուրդում 68 մլն շվեյցարական ֆրանկով (74,1 մլն դոլարով) վաճառվել է 59,60 կարատանոց ամենամեծ վարդագույն ադամանդը: Դա երբեւիցե աճուրդի հանված ամենաթանկ գոհարն է:
Ադամանդը նախապես գնահատվել էր 60 մլն դոլար, իսկ բուն աճուրդը տեւել է ընդամենը 5 րոպե: Նոր սեփականատերը դահլիճում էր, բայց նրա անունը չի հրապարակվել, նշում է ԻՏԱՌ-ՏԱՍՍ գործակալությունը:
Sotheby՛s International Jewellery ընկերության եվրոպական ու մերձավորարեւելյան բաժանմունքի ղեկավար Դեւիդ Բենեթը բացառիկ գույն ու մաքրություն ունեցող, ձվաձեւ երեսակված այդ ադամանդը համարում է բնության կերտած մեծագույն գանձերից մեկը: Ադամանդը ստացվել է Աֆրիկայում 1999 թ. արդյունահանված 132,5 կարատանող ալմաստի մշակմամբ, որով զբաղվել է De Beers ընկերությունը: «Վարդագույն աստղ» անվանակոչված թանկարժեք քարը 2003-ին ցուցադրվել էր ԱՄՆ-ումՙ աշխարհի մյուս վեց հազվագյուտ ադամանդների հետ: 2007-ին քարը անհայտ գնով վաճառվել էր անհայտ գնորդի:
