Նոյեմբերի 16-ին Գարեգին Բ Ամենայն հայոց կաթողիկոսը մեկնեց Ռուսաստանի եւ Նոր Նախիջեւանի հայոց թեմ, ուր նոյեմբերի 17-ին Մոսկվայի առաջնորդանիստ Ս. Պայծառակերպություն եկեղեցում տեղի ունեցավ շքանշանների հանձնման հանդիսավոր արարողություն:
Հանդիսապետությամբ Ամենայն հայոց կաթողիկոսի նորակառույց տաճարում մատուցվեց սուրբ եւ անմահ Պատարագ, որի ավարտին Վեհափառ հայրապետը Հայաստանյայց առաքելական ս. եկեղեցու «Սուրբ Գրիգոր Լուսավորիչ» եւ «Սուրբ Ներսես Շնորհալի» պատվո բարձր շքանշաններ եւ օրհնության գրեր հանձնեց Ռուսաստանի եւ Նոր Նախիջեւանի հայոց թեմի 122 բարերարների ի գնահատություն նրանց ազգօգուտ եւ եկեղեցաշեն գործունեության: Ս. խորանից հայրապետական սրբատառ կոնդակներն ընթերցեց թեմակալ առաջնորդ Եզրաս արքեպիսկոպոս Ներսիսյանը:
Հայաստանյայց առաքելական սուրբ եկեղեցու պարգեւների հանձնումից հետո ներկաներին հայրապետական իր օրհնությունն ու պատգամը բերեց Ամենայն հայոց կաթողիկոսը: «…Այսօր ուրախություն է մեզ համար, որ մեր Եկեղեցու հավատավոր զավակներին արժանին մատուցեցինք եւ նրանց կուրծքը զարդարեցինք մեր Եկեղեցու բարձր պարգեւներով, քանզի իրենց արդար վաստակի արդյունքն ընծայաբերում են բարին արարելու, Հայրենիքը շենացնելու, Եկեղեցին պայծառացնելու նվիրական սուրբ գործի համար: Արադարեւ, շքեղաշուք այս կառույցը, աղոթքի այս տունը փառաբանություն է ինչպես մեր ազգի, այնպես մեր բարերար զավակների համար»,- նշեց Նորին սրբությունը` գոհունակություն հայտնելով, որ այսօր մոսկվաբնակ հայորդիները հնարավորություն ունեն փառահեղ Ս. Պայծառակերպություն եկեղեցու մեջ աղոթելու եւ մասնակցելու սրբազան արարողություններին:
Վեհափառ հայրապետն իր խոսքում գնահատանքով հիշեց լուսահոգի Մուրադ Սարգսյանին եւ Մերուժան Լալայանին, ովքեր նույնպես ժամանակին իրենց կարեւոր մասնակցությունն էին բերել առաջնորդանիստ եկեղեցու շինարարական աշխատանքներին: Ամենայն հայոց կաթողիկոսն իր օրհնությունը բերեց նաեւ թեմակալ առաջնորդ Եզրաս արքեպիսկոպոս Ներսիսյանին թեմի հոգեւոր կյանքի աշխուժացման եւ եկեղեցական համալիրի կառուցման համար:
Այնուհետեւ, այս ուրախալի առիթով եկեղեցական համալիրի սեղանատանը տեղի ունեցավ ցերեկույթ, որի ընթացքում գեղարվեստական կատարումներով հանդես եկան Մոսկվայի Հայորդյաց տան «Ովսաննա» երգչախումբը խմբավարությամբ Լենա Բեգլարյանի, «Ակունք» ժողովրդական գործիքների եւ «Կոչնակ» դհոլահարների խմբերը, ինչպես նաեւ «Հայասա» պարային համույթը եւ մանուկների պարային նորաստեղծ խումբը:
Հանդիսության ընթացքում բարերաներին գնահատանքի խոսք ասաց Եզրաս սրբազանը: «Հոգու ուրախություն է մեզ համար, որ եկեղեցասեր ոգին զորեղ է ձեզ պես հայորդիների սրտերում եւ ծնունդ է տալիս բարի իրագործումների, որի ականատեսն ենք այսօր մենք բոլորս»,- ասաց սրբազան հայրը մաղթելով, որ Տիրոջ հովանավոր Աջը միշտ զորավիգ լինի նրանց` նույն եռանդով շարունակելու բարի գործերով շենացնել Մայր Եկեղեցին:
Երախտագիտության խոսքով հանդես եկան նաեւ ՌԴ-ում ՀՀ դեսպան Օլեգ Եսայանը, ազգային բարերար Սամվել Կարապետյանը եւ Ռուսաստանի եւ Նոր Նախիջեւանի հայոց թեմի թեմական խորհրդի ատենապետ Արթուր Չիլինգարովը:
Հանդիսության ավարտին ներկաներ
