Վ. Պ.
Վրաստանն արդեն նոր վարչապետ ունի, որ ժամանակին նախկին վարչապետին պատկանող ընկերություններից մեկի աշխատակիցն էր: Նոյեմբերի 20-ին վրացական խորհրդարանը հաստատեց նորընտիր նախագահ Գեորգի Մարգվելաշվիլու ներկայացրած կառավարության կազմը, որից հետո էլ երեկ Վրաստանի նախագահը ստորագրել է Իրակլի Գարիբաշվիլուն վարչապետի պաշտոնում նշանակելու հրամանագիրը:
Գարիբաշվիլին, որ ծնվել է Թբիլիսիում 1982-ին, դպրոցական տարիներին եղել է Վրաստանի քիքբոքսինգի չեմպիոն, բայց իր ապագան շարունակել է` ավարտելով Վրաստանի պետական համալսարանի միջազգային հարաբերությունների ֆակուլտետը: Այդուհետեւ կրթությունը շարունակել է Եվրոպայում` ավարտելով Սորբոնի համալսարանը, որն էլ նրան հնարավորություն է ընձեռել դառնալու աշխատակից միլիարդատեր Բիձինա Իվանիշիլուն պատկանող ընկերություններից մեկում: 2011-ի հոկտեմբերից քաղաքական գործիչ ներկայացող միլիարդատիրոջ թիմում Գարիբաշվիլին առաջատար դիրքերում էր, որը նախորդ տարվա հոկտեմբերին տեղի ունեցած խորհրդարանական ընտրություններից հետո փոխարինվեց ներքին գործերի նախարարի պաշտոնով:
Վրացական լրատվամիջոցները տեղեկացնում են, որ Գարիբաշվիլին արդեն ներկայացրել է իր ապագա աշխատանքի հիմնական կետերը, մասնավորապես, որ Վրաստանը առաջնահերթություն է տալիս Բաքու-Ախալքալաք-Կարս երկաթգծի շինարարությանը, վերանայելու է գրեթե 118 երկրների հետ ազատ անցագրային ռեժիմի կիրառությունը, հետեւողական է լինելու Եվրոմիության հետ միասնական օդային տարածքի հարցի կարգավորմանը եւ այլն:
Հայ-վրացական հարաբերությունների համատեքստում ինչ-որ փոփոխությունների ակնկալիքներ առայժմ չեն կարող լինել, առավել եւս, որ ինչպես Վրաստանի ներկայիս նախագահը, այնպես էլ վարչապետը, ինչպես ասում են, Իվանիշվիլու մարդիկ են, եւ ոնց վերջինս ասի, այդպես էլ կլինի: Ուղղակի հուսանք, որ սեփական ծագման հարցում հայկականության ստվերից անգամ վախեցած Սաակաշվիլուց հետո վրաց կառավարությունն ու իշխանություններն ընդհանրապես կկարողանան հայ-վրացական խնդիրներին մոտենալ կառուցողական դիրքորոշմամբ ու հարցերը լուծելու պատրաստակամությամբ:
