Առաջին ալիք Հասարակայնության հետ կապերի բաժին
«Մանկական Եվրոտեսիլ- 2013» երգի մրցույթում Հայաստանը կներկայանա երրորդ համարի ներքո: Վիճակահանության տվյալներով մրցույթի մասնակիցները ելույթ են ունենալու հետեւյալ հերթականությամբ.
1. Շվեդիա, 2. Ադրբեջան, 3. Հայաստան, 4. Սան-Մարինո, 5. Մակեդոնիա, 6. Ուկրաինա, 7. Բելառուս, 8. Մոլդովա, 9. Վրաստան, 10.Նիդերլանդներ, 11.Մալթա, 12. Ռուսաստան:
Այս տարի մրցույթի կանոնակարգում որոշակի փոփոխություն է կատարվել: Վիճակահանությանը մասնակցել են հենց մրցույթի մասնակիցները, ոչ թե պատվիրակությունների ղեկավարները, ինչպես եղել է նախկինում:
«Մանկական Եվրոտեսիլ- 2013» երգի մրցույթն այս տարի կանցկացվի Ուկրաինայի Արվեստների ազգային պալատում նոյեմբերի 30-ինՙ «Be Creative» նշանաբանի ներքո: Հայաստանը Եվրոպայի այս հեղինակավոր պատանեկան մրցույթին ներկայանում է 7-րդ անգամ:
Ընդհանուր առմամբ, մրցույթին այս տարի կմասնակցի 12 երկիր:
Տեղեկացնենք նաեւ, որ սկսվել է մասնակիցների մրցութային հագեցած շաբաթը: Նկարահանվել է արդեն մասնակիցների ելույթից առաջ ցուցադրվող բացիկը: Բոլոր երկրների ներկայացուցիչների մասնակցությամբ ձայնագրվել է նոր երգ, որը կրում է «Be Creative» խորագիրը:
«Մանկական Եվրոտեսիլ-2013» տարբերանշանը Puzzle Man է: Փազլ հավաքում են աշխարհի բոլոր երեխաները, որը զարգացնում է երեխայի ստեղծագործական միտքը եւ խորհրդանշում է տարբեր մասնիկներից բաղկացած միասնություն: Եվրոպայի տարբեր ծայրերից հավաքված երեխաները կհամախմբվեն մեկ գաղափարի շուրջ «Եղիր ստեղծագործ»:
Մրցույթն Առաջին ալիքը կցուցադրի նոյեմբերի 30-ինՙ ժամը 21:45-ին:
