Օգոստոսի 7-ին, Ռիո դե Ժանեյրոյում 83 տարեկան հասակում մահացել է բրազիլական հեռատեսիլի եւ կինոյի նշանավոր հայազգի դերասանուհի Արասի Բալաբանյանը: Մեր հեռուստադիտողը նրան հիշում է «Նոր զոհը» հեռուստասերիալից՝ Ֆիլոմենա Ֆեռետոյի գլխավոր դերակատարմամբ:
Ծնվել է Կամպու Գրանդի քաղաքում, հաճընցիների ընտանիքում (Ռաֆայել եւ Էսթեր Բալաբանյաններ): Արասին ընտանիքի ութերորդ զավակն էր, ծնողներն նախորդ ամուսնություններից արդեն ունեին յոթ երեխա: Աղջկա անունը վերաբերում է ինչպես Արաքս գետին, այնպես էլ Բրազիլիայի բնիկների լեզվով այն նշանակում է «լույսի մայր»:
Գործարար Ռաֆայել Բալաբանյանը ցանկացել է, որ դուստրը սոցիոլոգ դառնա: Արասին երեք տարի ուսանել է Սան Պաուլուի համալսարանի սոցիալական գիտությունների ամբիոնում, նաեւ զուգահեռ սովորել է Դրամատիկական արվեստի դպրոցում: Նախ հանդես է եկել թատրոնում, 1964 թվականին առաջին անգամ նկարահանվել է «Անտիգոնե» հեռուստաներկայացման մեջ՝ արժանանալով տարվա լավագույն դերասանուհի կոչմանը: Թատրոնում մասնակցել է ամերիկյան նշանավոր «Մազեր» մյուզիքլի բրազիլական տարբերակին: Ռիո դե Ժանեյրո տեղափոխվելուց հետո համագործակցել է «Գլոբո» հեռուստաընկերության հետ՝ մասնակցելով տասնյակ դրամատիկական եւ կատակերգական հեռուստասերիալների: 1990-ին «Մետաղի ջարդոնների թագուհին» հեռուստանովելում հանդես է եկել Դոննա Արմենիայի դերով: Ըստ սցենարի՝ գլխավոր հերոսուհին պիտի լիներ հունգարացի գաղթական, սակայն բեմադրիչն Արասիին առաջարկել է կերպարը դարձնել հայ: Այնժամ դերասանուհին աշխատել է իր հայերենի վրա եւ ասել, որ երբեք չի մոռանա ծնողների խոսած «լեզվի մեղեդին»՝ բրազիլական հեռուստասերիալ ներմուծելով հայկական առոգանությամբ պորտուգալերեն ու հայերեն արտահայտություններ…
Ա. Բ.
