Ռուսաստանն Արցախի առնչությամբ պարտավորություններն ստանձնել է ոչ թե պայմանավորելով այն բանով՝ ՀՀ վարչապետն Արցախը ճանաչել է Ադրբեջանի մաս, թե չի ճանաչել, այլ պարտավորվել է գործառույթներ իրականացնել Ադրբեջանի տարածքում, որովհետև Բերձորի միջանցքը համարվում է ադրբեջանական տարածք։ Azg.am-ի թղթակցի հետ զրույցում այս մասին ասաց քաղաքագետ Ռոբերտ Ղևոնդյանը՝ անդրադառնալով ՌԴ ԱԳՆ պաշտոնական ներկայացուցիչ Մարիա Զախարովայի հայտարարությանը։
Հիշեցնենք՝ վերջինս ճեպազրույցի ժամանակ հայտարարել էր՝ «Այն բանից հետո, երբ Հայաստանի ղեկավարությունը ճանաչեց Լեռնային Ղարաբաղը որպես ադրբեջանական, ջանքերի բացակայության մասին Ռուսաստանի դեմ ցանկացած պնդում անտեղի է»։
«Զախարովայի հայտարարությունն ընդամենը Ռուսաստանի կողմից իր պարտավորությունները չկատարելու արդարացում է, որը որևէ քննադատության չի դիմանում։ Մյուս կողմից էլ պետք է նշել, որ Ռուսաստանի գործողությունները Հայաստանի կողմից որևէ տարածք ճանաչել կամ չճանաչելով պայմանավորելը անիմաստ է, որովհետև վաղը Հայաստանը կարող է ճանաչել Ճապոնիայի տարածքային ամբողջականությունը, բայց դա չի նշանակում, որ ՌԴ-ն դուրս կգա Կուրիլյան կղզիներից»,- նշեց քաղաքագետը։
Անդրադառնալով Մարիա Զախարովայի դիտարկմանը, որ Արցախից ռուս խաղաղապահների դուրսբերման մասին փաստարկները բացարձակապես անհասկանալի են, քանի որ վերջիններս կարևոր գործառույթներ են կատարում, մեր զրուցակիցը նկատեց՝ ռուս խաղաղապահներն իսկապես կարևոր գործառույթ են կատարում, այն է՝ լայնամասշտաբ պատերազմ թույլ չտալը։
«Ինչպես երեկ ԱԺ քննիչ հանձնաժողովում հայտարարեց պաշտպանության նախկին նախարար Դավիթ Տոնոյանը, 44-օրյա պատերզմը կանգնեցնելու միակ միջոցը երրորդ ուժի ներկայությունն է եղել, և այո՛, իսկապես այդպես է։ Պետք է նշել, որ այսօր էլ լայնամասշտաբ պատերազմ թույլ չի տալիս ռուսական կոնտինգենտը, բայց դա բոլորովին չի նշանակում, որ նրանք իրականացնում են իրենց բոլոր գործառույթները, որոնք պետք է իրականացնեն։
Ռուսական խաղաղապահ կոնտինգենտի դուրս գալը հնարավոր է միայն մեկ դեպքում, եթե այն փոխարինվի մեկ այլ խաղաղապահ կոնտինգենտով։ Ինչո՞ւ փոխարինվի. որովհետև ենթադրվում է, որ այլ խաղաղապահ կոնտինգենտը կիրականացնի նաև այն գործառույթները, որոնք չի իրականացնում ռուսական խաղաղապահ կոնտինգենտը»,- նշեց Ռոբերտ Ղևոնդյանը։
Նրա խոսքով, սակայն, այստեղ մի շատ կարևոր հարց կա, որի մասին չի խոսվում. առանցքային է, թե ինչպիսի խաղաղապահ առաքելություն է ցանկանում արցախահայությունը՝ ռուսական, թե մեկ այլ։
