Շախմատի աշխարհի 13-րդ չեմպիոն Գարի Կասպարովն իր թվիթերի էջում նշել է, որ հաջորդ մրցափուլում Մագնուս Կառլսենի հետ շախմատային թագը վիճարկելու ամենամեծ հնարավորություններն ունեն Լեւոն Արոնյանն ու Վլադիմիր Կրամնիկը:
Հիշեցնենք, որ աշխարհի առաջնության եզրափակիչ մրցախաղի ուղեգրի համար 8 հավակնորդների մրցաշարը կայանալու է 2014-ի մարտի 11-ից ապրիլի 1-ը Ռուսաստանի Խանտի Մանսիյսկ քաղաքում:
Հետաքրքրական է, որ Կրամնիկի մասին հավակնորդների նախորդ մրցաշարի մեկնարկից առաջ Կասպարովը թերահավատորեն էր արտահայտվել. «Կրամնիկին էլ հաղթողի հավակնորդների շարքից դուրս չէի հանի: Վերջերս նրա 2-րդ երեխան ծնվեց: Նման դեպքերում մարդիկ սկսում են շեղվել հիմնական գործից եւ այլ բաների մասին մտածել»:
Իսկ Վլադիմիր Կրամնիկը վերջերս տված հարցազրույցում նշել է, որ հավակնորդների առաջիկա մրցաշարն իր համար հավանաբար վերջինը կլինի. «Հավանաբար դեռ 2-3 տարի կխաղամ: Իսկ 40-ից հետո կսկսեմ այլ բանի մասին մտածել: Վարկանիշով ես իրավունք ունեմ մասնակցելու հաջորդ տարի կայանալիք հավակնորդների մրցաշարին, այնպես որ լրջորեն եմ նախապատրաստվելու: Կարծում եմ, որ հնարավորություն ունեմ հաղթելու եւ շախմատային թագը վիճարկելու աշխարհի չեմպիոնի հետ»:
