Օրերս լրացավ սիրված երգչուհի, ՀՀ ժողովրդական արտիստուհի Ֆլորա Մարտիրոսյանի մահվան մեկ տարին: Հայ երգի անզուգական կատարող արվեստագետի ծննդավայր Գյումրիում, Շահինյան 6ա շենքի այն բնակարանի պատին, որտեղ 1969-81 թվականներին ապրել է երգչուհին, քաղաքապետարանի նախաձեռնությամբ հուշատախտակ է փակցվել: Հուշատախտակի բացմանը ներկա են եղել քաղաքային իշխանության, արվեստի բնագավառի ներկայացուցիչներ, երգչուհու զավակները, քույրը, հարեւաններ ու քաղաքի բնակիչներ:
Ֆլորա Մարտիրոսյանի ապրեցնող երգի ղողանջները դեռ երկար պիտի հնչեն հայի հոգում: Հուշատախտակի հեղինակըՙ քանդակագործ Ֆերդինանդ Առաքելյանը, երգչուհու պատկերաքանդակը ստեղծելիս ցանկացել ու ձգտել է, որ ժողովուրդը նայելիս լսի այդ երաժշտությունը…
