Ռումինիայի նախագահ Կլաուս Յոհանիսը հորդորել է Մոլդովայի և Ուկրաինայի առաջնորդներին պատրանքներ չունենալ ԵՄ-ին մոտալուտ անդամակցության վերաբերյալ։ Նման հայտարարություն նա արել է հինգշաբթի օրը Մոլդովայում կայացած Եվրոպական քաղաքական համայնքի գագաթնաժողովի շրջանակում կայացած ճեպազրույցի ժամանակ։
«Պատրանքներ չպետք է լինեն, այս գործընթացները շատ բարդ են: Կարող է տպավորություն ստեղծվել, թե դրանք երբեք չեն ավարտվի, բայց դրանք անհրաժեշտ բաներ են: Եթե բոլորը քրտնաջան աշխատեն, մի քանի տարում դրան կարելի է հասնել, բայց նայեք Բալկաններին, որտեղ եղել են վերելքներ ու վայրէջքներ: Հուսով եմ, որ Մոլդովան կմնա մշտական վերելքի վրա»,- ասել է Ռումինիայի ղեկավարը:
Ըստ նրա՝ Եվրոպան պետք է օգնի Մոլդովային և Ուկրինային։ «Եթե մենք՝ եվրոպացիներս, չենք կարողանում օգնել Ուկրաինային և Մոլդովայի Հանրապետությանը, դա նշանակում է, որ մենք պարտվել ենք, դա այդքան պարզ է։ Բայց սա միակ պատճառը չէ, որ մենք օգնում ենք Ուկրաինային և Մոլդովայի Հանրապետությանը, մենք դա անում ենք, քանի որ դա ճիշտ է, քանի որ մեր կարծիքով նրանք ժողովրդավարական Եվրոպայի մի մասն են, նրանք մեր համայնքի մի մասն են։ Մոլդովան և Ուկրաինան մեր մաս են կազմում»,- նշել է նա։
