Բեռլինի «Թրեշեր» հրատարակչությունը լույս է ընծայել «Հայաստան. 3000 տարվա մշակույթ արեւելքի եւ արեւմուտքի միջեւ» անունը կրող ճամփորդական ուղեցույց, որը Յասմինե Դում-Թրագութի կազմած գրքի արդիական ու ընդլայնված վերահրատարակությունն է եւ նպատակ է հետապնդում ճանապարհորդների համար այդ «արտասովոր» երկիրը բացահայտելու, իրազեկում է touristiklounge պորտալը:
Նույն տեղեկատու աղբյուրը ծանուցում է, թե աշխարհի հնագույն քրիստոնյա երկրներից մեկը, որ իր բնակիչների սիրառատ բնութագրմամբ «քարերի երկիր» անունն է ստացել, տպավորում է իր լեռնաշղթաներով հարուստ բնաշխարհով եւ հազարամյակների անգին հուշարձաններով:Վերջին տարիներին շատ վայրերում բարելավվել ու զարգացել է զբոսաշրջային ինֆրակառուցվածքըՙ հետաքրքրություն ներկայացնելով հատկապես մշակույթով հետաքրքրվող զբոսաշրջիկների, ինչպես նաեւ բնության հետ շփումը, սարերն ու լեռները մագլցելու հաճույքը նախընտրողների համար:
Գիրքն ընդգրկում է աշխույժ մայրաքաղաք Երեւանը, Արարատյան դաշտը, մարզերը, կանաչ հյուսիսն ու ոչ բանուկ, վայրի հարավը, Քարահունջն ու Սեւանա լիճը, Գառնին, Սանահինը, Հաղպատը, Գեղարդը, Տաթեւը, Էջմիածինը: Գիրքը տեղեկություններ է ներկայացնում պատմության եւ ճարտարապետության, հայոց սովորույթների, ավանդույթների մասին: Գրքի հատուկ բաժնում ներկայացված են նաեւ զբոսաշրջային հայտնի ուղեգծից դուրս կածանները, որ կհետաքրքրեն արշավների սիրահարներին, կան քարտեզներ, լեզվական ուղեցույց, հայաստանյան ճամփորդությանը վերաբերող այս կամ այն հարցի վերաբերյալ գործնական ցուցումներ:
